महिला राष्ट्रिय फुटबल टिमकी गोलरक्षक एन्जिला तुम्बापो सुब्बाको जीवनबाट प्रभावित भएर बनेको फिल्म ‘अन्जिला’को छायांकन सकिएको छ । छायांकन थालिएको ३४औँ दिनमा शनिबार काठमाडौँको तीनकुने क्षेत्रमा एन्जिलाकै अन्तिम सिन खिचिएको थियो । एन्जिलाकै जन्मथलो इलामको आइतबारेबाट छायांकन सुरु गरिएको थियो । यसपछि इलाम, झापा र काठमाडौँमा खिचिएको हो ।

मिलन चाम्स निर्देशित फिल्ममा एन्जिलाका साथै दयाहाङ राई, मिरुना मगर, सिर्जना सुब्बा, माओत्से गुरुङ, बुद्धि तामाङ, विजय बराल, हरि खड्का, मन्जु श्रेष्ठ, बेदना राई, सिध्दार्थ  सिंह, सुरज तमु, सुमिन गुरुङ, बिष्णु मोक्तानको पनि अभिनय छ । फिल्मका निर्माता प्रेम कुमार श्रेष्ठको पनि मुख्य भूमिका छ । एन्जिलाको व्यस्तताका कारण फिल्मको छायांकन सुरु हुन ढिला भएको थियो ।

छायाङ्कन सकिएपछि सह-निर्माताद्वय राजेश बगडिया र विनोद अग्रवालले एन्जिलालाई एकथान स्कुटर उपहार प्रदान गरेका छन् । त्यस्तै, फिल्मलाई सम्पन्न गरिदिएकोमा धन्यवाद दिँदै निर्माता प्रेम कुमार श्रेष्ठले निर्देशक चाम्सलाई पनि बिनेली ब्रान्डको एक स्कुटर उपहार दिएका छन् । फिल्मले एन्जिलाको बालापनदेखि फुटबलर बन्नलाई गरेको सङ्घर्ष र सफलताको कथालाई वाचन गरेको छ ।

सफल खेलाडी बन्नुभन्दा अघि एन्जिलाले धेरै दुःखहरु भोगेको र इच्छाशक्ति भएदेखि असम्भव भन्ने कुरा नहुने सन्देश फिल्मले दिने निर्देशक चाम्सले बताए । उनले यो फिल्म एन्जिलाको बायोपिक भने नभएको स्पष्ट पारेका छन् । ७५ प्रतिशत एन्जिलाकै जीवनी उतारिएको तर बायोपिक नरहेको उनको भनाई छ । सुदीप बरालको छायांकन रहेको फिल्मलाई मिलन श्रेष्ठले सम्पादन गर्नेछन् ।