माधवराज खरेल निर्देशित फिल्म ‘चिट्ठी’को पहिलो गीत सार्वजनिक गरिएको छ । ‘टुटेको तारा’ बोलको वियोगान्त भावको गीतमा शिव परियारको स्वर, डा. कृष्णहरि बरालको शब्द रचना र सरोज कोइरालाको संगीत छ । गीतको भिडियोमा फिल्मका प्रमुख अभिनेता सञ्जीत भण्डारी चित्रित छन् । गीतमा उनी प्रेम वियोगमा मानसिक सन्तुलन गुमेको पात्रको रुपमा जीवन्त देखिएका छन् ।
फिल्ममा सञ्जीतका साथै खड्ग बहादुर पुन मगर ‘खबपु’, गोपाल ढकाल ‘छन्दे’, नवराज थापा, मुस्कान लामा, कञ्चन चालिसे, प्रवण भुसाल, श्रीदेव भट्टराईको पनि मुख्य भूमिका छ भने नम्रता खरेल, रश्मि भट्ट, मोहन निरौला, शान्तिप्रिय, राजन थापा, डेविल सिंह राजपूत, प्रह्लाद खरेल, उद्धव भट्टराई, समीर लामा, पूर्ण राई, पुरुषोत्तम सानु आदिले महत्त्वपूर्ण भूमिकामा अभिनय गरेका छन् ।
फिल्मलाई जीवन पराजुली र राजन खरेलले खिचेका हुन् भने निर्देशक खरेल र अच्युत बजगाईँको सम्पादन रहेको छ । फिल्मको सहायक निर्माता अनिता कुँवर, समीर खान र कृष्णादेवी आचार्य हुन् । काठमाडौँ, काभ्रेपलान्चोक तथा ललितपुर क्षेत्रमा छायाङ्कन गरिएको फिल्म एरा प्रोडक्सनको ब्यानरमा कमला जोशीले निर्माण गरेकी हुन् । फिल्मको प्रदर्शन मिति भने घोषणा गरिएको छैन ।
