बलिउड सुपरस्टार शाहरुख खानका लागि २०२३ करिअरकै सबैभन्दा स्मरणीय बनेको छ । यही वर्ष उनका दुई फिल्म ‘पठान’ र ‘जवान’ले बक्स अफिसमा ठूलो रेकर्ड बनाए । अब उनी नयाँ फिल्म ‘डंकी’बाट यस वर्ष ह्याट्रिक गर्ने धाउन्नमा छन् । यही डिसेम्बर २१ मा रिलिज हुन लागेको फिल्मलाई राजकुमार हिरानीले निर्देशन गरेका हुन् । उनको नाम नै फिल्म सफल हुने आधार मानिन्छ ।
यसबीच, मंगलबार फिल्मको ट्रेलर सार्वजनिक गरिएको छ । शाहरुख ‘पठान’ र ‘जवान’मा भन्दा फरक अवतारमा देखिएका छन् । फिल्मको कथा सन् १९९५ बाट सुरु छ । लण्डन सपनालाई उठाइएको ट्रेलरमा एक्सन, प्रेम र कमेडीको मिश्रिण छ । तापसी पन्नू, विक्की कौशल, विक्रम कोचर र अनिल ग्रोवरलाई शाहरुखको साथीको रुपमा प्रस्तुत गरिएको छ, जसको सपना लण्डन जानु हो ।
आफ्नो र परिवारको सुन्दर भविष्यका लागि लण्डन जान निस्किएका पाँच पात्रले गर्ने संघर्ष र बेहोर्ने मुश्किल परिस्थितिलाई ट्रेलरमा चित्रित गरिएको छ । ट्रेलरले फिल्मको कथा रोचक रहेको संकेत गर्छ । फिल्ममा बोमन इरानीको पनि मुख्य भूमिका छ । निर्देशक हिरानी स्वयंको सम्पादन रहेको फिल्ममा उनका साथै अभिजात जोशी र कनिका धिलनको कथा, पटकथा तथा संवाद लेखन छ ।
