निर्देशक दिनेश राउतको नयाँ फिल्म ‘पूजार सार्की’मा अहिलेका तीन स्टार नायकहरु एकसाथ देखिने भएका छन् । आर्यन सिग्देल र प्रदीप खड्कापछि निर्देशक राउतले शनिबार पल शाहसँग सम्झौता गरेका छन् । अहिलेका नायकहरु आ-आफैं भिडिरहेको भन्ने टिप्पणी भैरहेको समयमा यो टिमअपले सकारात्मक सन्देश दिने देखिन्छ । पलले हालै फिल्म ‘मायावी’को छायांकन भ्याएका हुन् ।

पलले जेलमुक्त भएपछि नै निर्देशक राउतसँग सहकार्य गर्न खोजेका थिए । त्यसका लागि उनी आफैंले फिल्म निर्देशनको प्रस्ताव दिनेशलाई राखेका थिए । अन्ततः ‘पूजार सार्की’मा उनीहरुको सहकार्य जुरेको छ । पल र प्रदीपले भने यसअघि फिल्म ‘हुतुतु’मा काम गर्ने चर्चा थियो । तर, यो फिल्म नै बन्न सकेन । अब तीन स्टार नायकलाई एकसाथ पर्दामा हेर्न दर्शकलाई पनि रोचक हुनेछ ।

संगीतकार सुभाष भुषालको निर्माण रहने फिल्मका लेखक विकास सुवेदी हुन् । सुवेदीसँग निर्देशक राउतको यसअघि ‘प्रकाश’मा सहकार्य भएको थियो । आगामी माघ पहिलो हप्ताबाट छायांकन सुरु हुन लागेको फिल्मका लागि अभिनेत्रीको टुंगो लाग्न बाँकी छ । एक कम्युनिष्ट व्यक्तिले जातिय समानताको लागि कसरी आफूलाई सार्कीमा बदल्छ भन्ने विषयमा आधारित भएर फिल्म बन्नेछ ।