गत कात्तिक १० गते घाँस काट्ने क्रममा भीरबाट लडेर गम्भीर घाइते भएका अभिनेता प्रकाश घिमिरे करिब डेढ महिनापछि फिल्म ‘महाजात्रा’बाट छायांकनमा फर्किएका छन् । उनले शनिबारबाट बुढानिलकण्ठस्थित मह स्टुडियोमा फिल्मको छायांकन सुरु गरेका हुन् । उनलाई डाक्टरले अझै केही समय ‘बेड रेस्ट’ गर्न भनेका थिए । तर, उनी आफैंले फिल्ममा काम गर्ने इच्छा देखाएका हुन् ।
‘जात्रा’ श्रृंखलामा उनले अभिनेता विपिन कार्कीको ससुराको भूमिका निर्वाह गर्दै आएका छन् । उनको छोरीको भूमिकामा अभिनेत्री वर्षा राउत छिन् । फिल्म छायांकनकै क्रममा उनी घाइते भएपछि निर्माण टिमले उनको स्वास्थ्य लाभको कामना गर्दै बौद्ध तान्त्रिक विधिअनुसार पूजा पनि गराएको थियो । उनको भागको दृश्यलाई थाती राख्दै बाँकी छायांकन भने एक महिनादेखि भैरहेको थियो ।
अहिले निर्देशक प्रदीप भट्टराईले घिमिरे र हरिवंश आचार्यको एकसाथ छायांकन गरिरहेका छन् । यसपछि प्रकाश ओखलढुंगाको रुम्जाटारमा फिल्म ‘डिग्री माइला’को छायांकनमा व्यस्त हुनेछन् । उनको पाइपलाइनमा अरु पनि फिल्म छन् । सहायक चरित्रमा उनको उच्च माग छ । अस्पतालमा उपचारार्थ रहँदा उनी अभिनीत फिल्म ‘पशुपति प्रसाद २ : भष्मे डन’ हलमा प्रदर्शनरत थियो ।
‘महाजात्रा’को कुरा गर्दा यो फिल्म आगामी चैत ९ गतेबाट प्रदर्शनमा आउँदैछ । भट्टराई स्वयंको लेखन रहेको फिल्ममा रविन्द्र झा, रविन्द्र सिंह बानियाँ, फिल्ममा शिशिर बाङ्देल, राजाराम पौडेल, प्रवीण खतिवडा, दिव्यदेव पन्त, सुमन कार्की, गौमाया गुरुङ लगायतको पनि अभिनय छ । काठमाडौंपछि जनकपुरमा छायांकन हुने फिल्मलाई पुरुषोत्तम प्रधानले छायांकन गरिरहेका छन् ।
