आगामी फागुन २५ गतेबाट प्रदर्शनमा आउन लागेको फिल्म ‘रङ्गेली’ स्टारकास्टका कारण चर्चामा छ । हिटमा ह्याट्रिक गरिसकेको जोडी दयाहाङ राई र मिरुना मगरको मुख्य भूमिका रहेको फिल्ममा अर्पण थापा भिलेन बनेका छन् । यस्तै, अर्का अभिनेता प्रवीण खतिवडाले प्रहरी निरीक्षक (इन्सपेक्टर)को भूमिका निभाएका छन् । बिहीबार उनको क्यारेक्टर पोस्टर सार्वजनिक गरिएको छ ।
दुईवटा पोस्टरमध्ये एउटामा उनी प्रहरीको ड्रेसमा प्रस्तुत छन् । उनले आँखामा लगाएको कालो चश्मामा दयाहाङ राईलाई धमिलो रुपमा ग्याङस्टार लुक्समा देख्न सकिन्छ । त्यसैगरी, दोस्रो पोस्टरमा प्रवीण सिभिल ड्रेसमा बन्दूक ताकेको अवस्थामा चित्रित छन् । उनलाई पोस्टरमा मान बहादुर ढकालको रुपमा चिनाइएको छ । फिल्ममा उनको भूमिका बलियो हुनसक्ने पोस्टरले संकेत गर्छ ।
अर्जुन सुवेदीको लेखन तथा निर्देशन रहेको ‘रङ्गेली’का गीतमा हर्क साउद, अर्जुन सुवेदी र सबिन सिंहको शब्द रचना तथा सुशान्त गौतम र हर्कुलस बस्नेतको संगीत छ । जीतेन्द्र खतिवडा र अनुज जङ्ग थापा कार्यकारी निर्माता, संसार चौलागाईं र रमेश भट्टराई (वशिष्ठ) निर्माता तथा युवक कार्की र शिव शङ्कर चौलागाईँ सह-निर्माता रहेको फिल्मलाई सुशन प्रजापतिले छायांकन गरेका हुन् ।
