कुनै समय फिल्म निर्माण र अभिनयमा प्रज्ञा जोशी सक्रिय देखिएकी थिइन् । ‘नोटबुक’, ‘सम्झना’, ‘सपुत’, ‘न बिर्सें तिमीलाई न पाएँ तिमीलाई’ जस्ता फिल्म निर्माण गरिसकेकी उनी केही वर्षयता भने सिरियलतिर आकर्षित छिन् । यतिबेला ‘सहारा’ नामक सिरियल निर्माण तथा अभिनयमा व्यस्त रहेकी उनी अब १७ वर्षअघिको लोकप्रिय टेलिसिरियल ‘सिन्दूर’ पुनः निर्माण गर्न लागिपरेकी छन् ।

शुक्रबार काठमाडौंस्थित भद्रकाली मन्दिरमा उक्त सिरियलको शुभ साइत गरियो । विनय राज पौडेलको लेखन तथा निर्देशन रहने सिरियलमा प्रज्ञाको साथमा नविन श्रेष्ठ, लक्ष्मी भुषाल, प्रदीपराज गिरी, अश्मी थापा, दीपेनद्र सोनाम, स्नेहा पौडेल, पूर्णिमा जिएम, टेकेन्द्र न्यौपाने, पवन केसी आदिको मुख्य भूमिका रहनेछ । मदन कश्यप घिमिरेले सिरियल छायांकनको जिम्मेवारी पाएका छन् ।

लय संग्रौलाको गीत रचना तथा सम्राट थापाको संगीत रहने सिरियल प्रज्ञा फिल्मस्को ब्यानरमा निर्माण हुनेछ । निर्मात्री जोशीले १७ वर्षअघिको टेलिसिरियल अहिलेको पुस्तालाई मध्यनजर गरेर बनाउन लागिएको जानकारी दिइन् । अहिले पनि यो सिरियल उत्तिकै सान्दर्भिक रहेकाले उत्कृष्ट बनाउन कोसिस गर्ने उनको भनाई छ । उनले अब फिल्म निर्माणको योजना रहेको पनि बताएकी छन् ।