अभिनेत्री वर्षा राउत विवाहपछि व्यवसायमा पनि जोडिएकी छिन् । श्रीमान् संजोग कोइरालासँग मिलेर उनले ‘चिया अड्डा’सँगै केही रेस्टुरेन्ट व्यवसायमा हात हालेकी छन् । तर, सबै व्यवसाय लगभग संजोग एक्लैले हेरिरहेका छन् । वर्षा भने फिल्ममा व्यस्त छिन् । अब उनी आफैं ‘रिक्स’ लिएर विजनेश गर्न चाहन्छिन् । अर्थात् आफ्नो एकल लगानी र रेखदेखमा विजनेश गर्ने उनको योजना हो ।

शनिबार काठमाडौंको चोभारस्थित मन्जुश्री पार्कमा सञ्चालनमा ल्याइएको नेपालको पहिलो ‘क्यानोपी जिप लाइन’को उद्घाटन गर्ने क्रममा वर्षाले भनिन्, ‘अहिले मैले संजोगकै भरमा विजनेश गरिरहेको छु । तर, मलाई आफैं ‘रिक्स’ लिएर विजनेश गर्न मन छ । संजोगबाट सुझाव त भैहाल्छ तर ‘सेल्फ डिपेन्डेन्ट’ भएर विजनेशमा ‘रिक्स’ लिन चाहन्छु । तर, कहिले लिन्छु मलाई नै थाहा छैन ।’

यसै हप्ता वर्षाको जन्मदिन समेत परेको थियो । तर, पहिलेजस्तो जन्मदिनमा हुने उत्सुकता यसपटक भने नभएको उनी बताउँछन् । उनले आफूलाई परिपक्व महसुस गरेकी छन् । ‘योपालिको जन्मदिनमा अलि परिपक्व भएको महसुस भयो । पहिला जन्मदिनलाई लिएर जुन ‘एक्साइटमेन्ट’ हुन्थ्यो, त्यो हुन छाडेको छ । सामान्य रुपमा नै यसपटक जन्मदिन मनाएँ,’ उनी सञ्चारकर्मीसँग सुनिइन् ।

एक महिनादेखि उनी फिल्म ‘महाजात्रा’को छायांकनमा व्यस्त छिन् । यसमा उनको जोडी अभिनेता विपिन कार्कीसँग बाँधिएको छ । वर्षा र विपिन नेपाली फिल्मका सफल जोडी मानिन्छन् । यद्यपि, वर्षालाई सबैसँग जोडी सुहाओस् भन्ने लोभ छ । अहिले विपिन कार्कीसँग जोडी फापेकाले यसरी नै चलिरहोस् भन्ने पनि उनलाई लाग्छ । ‘महाजात्रा’पछि उनीहरुले ‘तेल भिसा’मा काम गर्दैछन् ।