यतिबेला भारतसँगै नेपालमा फिल्म ‘टुवेल्थ फेल’को ठूलो चर्चा छ । विधु विनोद चोपडाको निर्देशन रहेको फिल्म ओटीटीमा रिलिज भएसँगै तारिफ मिलिरहेको छ । त्यसो त भारतीय बक्स अफिसमै ५० करोडमाथि कमाउँदै फिल्म ‘सुपरहिट’ सावित भएको थियो । एकातिर फिल्मको कन्टेन्टलाई लिएर चर्चा भइरहेको छ भने अर्कोतिर श्रद्धा पात्र अर्थात् मेधा शंकर ‘लाइमलाइट’मा आएकी छन् ।
मेधाको सुन्दरता, सरलता र सादगीपन दर्शकले मनपराएका छन् । मनोज कुमार शर्माको पात्रमा अभिनय गरेका विक्रान्त मेसीको गर्लफ्रेण्डको भूमिकामा देखिएकी उनको कम ‘स्क्रिन स्पेश’मा पनि आफ्नो अभिनयको छाप छाडेकी छन् । यतिबेला सामाजिक सञ्जाल प्रयोगकर्ताहरुले उनलाई ‘नेशनल क्रस’ बनाएका छन् । सामाजिक सञ्जालमा उनको फलोअर्स पनि लाखौंले बढिरहेको छ ।
मेधाको अभिनयका साथै गायनमा पनि रुचि छ । फिल्मको एक सिनमा उनलाई गुनगुनाएको पनि देखिइएको छ । उनले डान्सको समेत तालिम लिएकी छन् । उनले स्कूले जीवनमा नृत्य र गायनका धेरै प्रतियोगितामा भाग लिएकी थिइन् । ब्रिटिश हिस्टोरिकल ड्रामा टीभी सिरिज ‘बीचम हाउस’बाट अभिनय यात्रा थालेकी उनले सन् २०२१ मा ‘शादीस्तान’बाट फिल्ममा डेब्यू गरेकी थिइन् ।
उनले सर्ट फिल्म ‘विथ यू फोर यू अलवेज’ र डिज्नी प्लस हटस्टारको वेब सिरिज ‘दिल बेकरार’मा पनि काम गरेकी छन् । ‘टुवेल्थ फेल’ले भने उनलाई अभिनय करिअरमा पुर्नजन्म दिएको छ । उनलाई अडिसनबाट निर्देशक चोपडाले श्रद्धा पात्रमा चयन गरेका थिए । यो फिल्म प्रदर्शनमा आएपछि उनलाई प्रतिष्ठित ब्यानरबाट फिल्म अफर पुगिरहेको भारतीय मिडियाले उल्लेख गरेका छन् ।
