नयाँ छिमलका ‘स्टार’ अभिनेता प्रदीप खड्का जुन फिल्ममा जोडिन्छन्, त्यस फिल्मकी अभिनेत्रीसँग अक्सर उनको नाम जोडिन्छ । ‘प्रेमगीत’ गर्दा पूजा शर्मासँग र ‘लिलिबिली’ गर्दा जसिता गुरुङसँग उनको अफेयरको चर्चा चलेको थियो । रिल र रियल दुवैमा राम्रो ‘बोन्डिङ’ देखिँदा यसखालको चर्चा हुने गरेको पाइन्छ । यस्तै ‘बोन्डिङ’ अहिले प्रदीपको अभिनेत्री परीक्षा लिम्बूसँग देखिएको छ ।
प्रदीप र परीक्षाले फिल्म ‘पूजार सार्की’मा एकसाथ काम गर्दैछन् । यतिबेला दुवै वर्कसपमा व्यस्त छन् । फिल्ममा उनीहरु जोडीको रुपमा देखिन लागेकाले रियल लाइफमा दुवैबीच राम्रो ‘बोन्डिङ’ हुन आवश्यक छ । यसैले उनीहरु एकअर्कासँग सहज बन्ने प्रयास गरिरहेका छन् । सोमबार परीक्षाले फेसबुक र इन्स्टाग्राममा सेअर गरेका तस्वीरमा उनीहरुबीच राम्रो ‘बोन्डिङ’ बनेको देखिन्छ ।
‘हार्ट इमोजी’सहित परीक्षाले क्याप्सनमा ‘मीठो मुस्कान मीठो मान्छेसँग’ लेख्दै सेअर गरेका प्रदीपसँगका तीन तस्वीरमध्ये एउटामा दुवै रोमान्टिक भावमा देखिएका छन् । दोस्रोमा प्रदीप अनुहार विगारेर मजाकिया शैलीमा देखिँदा परीक्षाले उनको पाखुरामा हात राखेकी छन् । तेस्रो तस्वीरमा दुवै मोवाइल हेर्दै हाँसिरहेका छन् । यी तस्वीरले उनीहरु एकअर्कासँग ‘कम्फर्ट’ रहेको संकेत गर्छ ।
परीक्षाले यसअघि फिल्म ‘छक्का पञ्जा ४’मा अभिनेता राज आचार्यको जोडी भएर काम गरेकी थिइन् । उनको फिल्म ‘जारी’मा पनि अभिनय छ । तर, यी दुवै फिल्मले उनलाई दर्शकको ठूलो वर्गमा चिनाउन सकेन । अब उनलाई ‘पूजार सार्की’बाट ठूलो अपेक्षा छ । दिनेश राउतको निर्देशनमा बन्न लागेको फिल्ममा आर्यन सिग्देल, पल शाह र अञ्जना बराईली पनि मुख्य भूमिकामा देखिँदैछन् ।
