आगामी माघ ११ गते हुन लागेको राष्ट्रिय सभा निर्वाचनमा नेपाली फिल्म क्षेत्रको प्रतिनिधित्व गर्दै ‘कुशुमे रुमाल’का निर्माता उद्धव पौडेलले कोशी प्रदेशबाट उम्मेदवारी दिएका छन् । उनी राप्रपाबाट उम्मेदवार बनेका हुन् । अब उनको गठबन्धनका उम्मेदवार कृष्ण सिटौला र एमालेका पर्शुराम अधिकारीसँग प्रतिस्पर्धा हुनेछ । उनी चाबहिलमा रहेको गोपीकृष्ण हलका मालिक समेत हुन् ।
बागमती प्रदेशबाट उम्मेदवारमा सिफारिस भएका अभिनेता नीर शाहको भने यसपटक पनि राष्ट्रिय सभा सदस्य बन्ने सपना अधुरै भएको छ । सत्ता गठबन्धनमा सिट बाँडफाँड गर्दा कांग्रेसले उनको नाम काटेको हो । यसअघि २०७८ सालमा उनलाई कांग्रेसले राष्ट्रपतिबाट मनोनित गरेर राष्ट्रिय सभामा पठाउन खोजेको थियो । त्यसबेला पनि गठबन्धनकै कारण उनको नाम काटिएको थियो ।
त्यस्तै, गण्डकी प्रदेशबाट राष्ट्रिय सभा निर्वाचनका लागि उम्मेदवारमा सिफारिस भएका फिल्म निर्देशक तथा कांग्रेस निकट नेपाल सांस्कृति संघका अध्यक्ष तीर्थ थापाको पनि खाली हात भएको छ । १९ सिटमा हुने राष्ट्रिय सभा निर्वाचनमा यसपटक फिल्म क्षेत्रबाट उद्धव पौडेल मात्र मैदानमा देखिएका छन् । यसअघि अभिनेत्री तथा गायिका कोमल वली एमालेबाट राष्ट्रिय सभामा पुगेकी थिइन् ।
