सफल फिल्म ‘जात्रा’ फेन्चाइजको तेस्रो श्रृंखला ‘महाजात्रा’को पहिलो गीत सार्वजनिक गरिएको छ । माघे संक्रान्तिको अवसर पारेर युट्युबमा सार्वजनिक गरिएको ‘आहा क्या राम्रो’ बोलको लोक शैलीको गीतमा मोडल आश्मा विश्वकर्मा र अभिनेता अरुण क्षेत्रीको आकर्षक नृत्य छ भने फिल्मका मुख्य अभिनेता विपिन कार्की र अभिनेत्री वर्षा राउत पनि रोमान्टिक भावमा नृत्य गर्दै प्रस्तुत छन् ।
एकनारायण भण्डारीको शब्द रचना, आशिष अविरलको संगीत तथा आशिष र अस्मिता अधिकारीको युगल गायन छ । कविराज गहतराजको कोरियोग्राफी रहेको गीतमा रविन्द्र झा र रविन्द्र सिंह बानियाँ पनि नृत्य गर्दै देखिएका छन् । गीतको अडियो र भिडियो दुवै सशक्त छ । खुलामञ्चमा आकर्षक सेट बनाएर खिचिएको यो गीतको छायांकनमा मात्रै ५ दिन लागेको कविराज बताउँछन् ।
प्रदीप भट्टराईको निर्देशन रहेको फिल्ममा हरिवंश आचार्य पनि मुख्य भूमिकामा छन् । राजाराम पौडेल, अर्जुनजंग शाही, शिशिर वाङ्देल, मोहन निरौला, पुष्कर गुरुङ, दिव्य देव, गौमाया गुरुङ, प्रकाश घिमिरे, सुमन कार्की, रजनी गुरुङ लगायतको पनि फिल्ममा अभिनय छ । षट्कोण आर्ट्सको ब्यानरमा निर्माण भएको फिल्म आगामी चैत ९ गतेबाट प्रदर्शनमा आउने तयारीमा छ ।
रविन्द्र सिंह बानियाँ कार्यकारी निर्माता रहेको ‘महाजात्रा’को निर्माता म्याक्स दीपेश खत्री र यज्ञश्वर पौडेल हुन् । पुरुषोत्तम प्रधानको छायांकन र मित्र डि गुरुङको सम्पादन रहेको फिल्ममा निर्देशक भट्टराई स्वयंको लेखन छ । ‘जात्रा’को अघिल्ला दुई सिरिज पैसा र सुनमा केन्द्रित भएर बनेका थिए । ‘महाजात्रा’मा भने सुन र पैसासँगै राष्ट्रिय मुद्दा (राजनीति)लाई पनि समेटिएको बताइएको छ ।
