अभिनेता नाजिर हुसेनका लागि फिल्म ‘अगस्त्य’ विशेष छ । किनकि, यसमा उनी एक्सन भूमिकामा प्रस्तुत छन् । त्यसका लागि उनले २० केजी तौल समेत बढाएका थिए । अब उनको ‘क्यारेक्टर’ पोस्टर सार्वजनिक गरिएको छ । पोस्टरमा उनी फरक-फरक लुक्स र मनोभावमा प्रस्तुत छन् । कुनैमा उनी एक्सन मुडमा रगताम्मे भएर देखिएका छन् भने कुनैमा गम्भीर भावमा चित्रित छन् ।
नाजिरको लुक्स र गेटअपले मधेशी चरित्र बुझाउँछ । उनले काँधमा गम्छा भिरेका छन् भने घाँटीमा बुट्टी देखिन्छ । फिल्ममा उनले निशान पात्रमा अभिनय गरेका छन् । यसअघि अभिनेता सौगात मल्लको क्यारेक्टर पोस्टर सार्वजनिक गरिएको थियो । जसमा उनी दुई फरक अवस्थामा चित्रित थिए । अबको पालोमा अभिनेत्री मलिका महतको क्यारेक्टर पोस्टर सार्वजनिक गर्ने तयारी गरिँदैछ ।
सौरभ चौधरीको लेखन तथा निर्देशनमा तयार भएको ‘अगस्त्य’मा प्रकाश मल्ल, अनिष तामाङ र बिनोद पौडेल निर्मातामा छन् भने कार्यकारी निर्माता विश्व गौचन र अभिषेक चौधरी हुन् । प्रमोद अग्रहरी, विजय बराल, रवीन्द्र झा लगायतको पनि विशेष भूमिका रहेको फिल्मको दुई श्रृंखला बन्ने जनाइएको छ । यो फिल्म आगामी फागुन १८ गतेबाट सार्वजनिक प्रदर्शनमा आउने तयारीमा छ ।
