व्यक्तिगत जीवनमा आएको उतार-चढावपछि अभिनेत्री शिल्पा पोखरेल ५ वर्षदेखि फिल्मबाट टाढा देखिएकी छन् । उनी अभिनीत पछिल्लो फिल्म ‘भिलेन’ हो, जुन सन् २०१९ मा रिलिज भएको थियो । यसपछि उनले नयाँ फिल्म सम्झौता गरेको जानकारीमा छैन । बरु यो बीचमा उनले तीनवटा जति भोजपुरी फिल्ममा काम गरिन् । नेपाली फिल्ममा भने उनको कमब्याक अझै अनिश्चित छ ।
म्यूजिक भिडियो हुँदै फिल्म ‘लज्जा’बाट अभिनेत्रीको रुपमा डेब्यू गरेकी शिल्पाले त्यसयता ‘किस्मत २’, ‘मंगलम’, ‘हवल्दार सुन्तली’, ‘फागु’, ‘वृन्दावन’ आदि फिल्ममा अभिनय गरिसकेकी छन् । तर, उनलाई निर्माता छविराज ओझाको फिल्म मात्र फापेको थियो । पछि उनै निर्माता ओझासँगै विवाह गरेकी शिल्पा अहिले अलग भैसकेकी छन् । त्यसयता नै उनको फिल्ममा सक्रियता घटेको हो ।
यद्यपि, उनले म्यूजिक भिडियोबाट आफूलाई गुमनाम हुन दिएकी छैनन् । २ वर्षयताको आँकडा हेर्ने हो भने उनले अभिनय गरेका ‘डाँडाघरे साइँली’, ‘हैन होला र’, ‘नीरमाया ठूली’ आदि गीत चर्चित छन् । २०२३ मा आधा दर्जन बढी गीतमा अभिनय गरेकी उनको २०२४ का लागि पहिलो गीत ‘म को हुँ ?’ रिलिज भएको छ । यो गीतमा शिल्पाको जोडी अभिनेता सरोज खनालसँग बाँधिएको छ ।
रामकृष्ण ढकाल र रानी शाक्यको युगल स्वरमा रहेको गीतमा रिमेश कुमारको संगीत तथा जनक वाग्लेको शब्द रचना छ । कुमार केसीको छायांकन र विजेश पौडेलको सम्पादन रहेको गीतको भिडियोलाई रसरंग मिडियाले तयार पारेको हो । सुलोचना गौतम र सुशान्त ढकालको पनि भिडियोमा अभिनय छ । वियोगात्मक शब्दभावको यो गीतमा शिल्पा र सरोजको अभिनय जीवन्त देखिन्छ ।
