अभिनेत्री मलिका महतलाई चाँदनीको रुपमा चिनाउँदै फिल्म ‘अगस्त्य : च्याप्टर वान’को चौंथो चरणको पोस्टर सार्वजनिक गरिएको छ । सोमबार सार्वजनिक दुईवटा क्यारेक्टर पोस्टरमा मलिका साधारण र हँसमुख युवतीको रुपमा चित्रित छिन् । एक पोस्टरमा उनी अभिनेता सौगात मल्लसँग रोमान्टिक भावमा देखिएकी छन् । यसले फिल्ममा उनीहरुको जोडी बाँधिएको स्पष्ट संकेत गर्छ ।

सौगातको भने यसअघि नै क्यारेक्टर पोस्टर सार्वजनिक भैसकेको छ, जसमा उनी दुई फरक अवस्थामा देखिएका छन् । मानसिक सन्तुलन गुमेको चरित्रमा उनको लुक्सले फिल्मप्रति दर्शकमा चासो बढाएको छ । फिल्मलाई सौरभ चौधरीले निर्देशन गरेका हुन् । यो फिल्मलाई उनले आफ्नो ‘डू एन्ड डाई’को रुपमा लिएका छन् । यसअघि उनले फिल्म ‘लभ डायरीज’को निर्देशन गरेका थिए ।

निर्देशक चौधरी स्वयंको लेखन रहेको फिल्ममा नाजिर हुसेन, प्रमोद अग्रहरी, विजय बराल, रवीन्द्र झा लगायतको पनि अभिनय छ भने अभिनेता निश्चल बस्नेत केमियो भूमिकामा देखिँदैछन् । आगामी फागुन १८ गते (मार्च १)बाट प्रदर्शनमा आउने तयारीमा रहेको फिल्ममा प्रकाश मल्ल, अनिष तामाङ र बिनोद पौडेल निर्मातामा छन् भने कार्यकारी निर्माता विश्व गौचन र अभिषेक चौधरी हुन् ।