बलिउडका दुई एक्सन स्टार अक्षय कुमार र टाइगर श्राफ अभिनीत फिल्म ‘बडे मियाँ छोटे मियाँ’को टिजर सार्वजनिक गरिएको छ । ‘एक्सन प्याक्ड’ टिजरमा आर्मी र आतंककारी समुहबीचको द्वन्द्वलाई देखाइएको छ । आर्मी अफिसरको भूमिकामा रहेका अक्षय र टाइगर खतरनाक ‘स्टन्ट’ गर्दै प्रस्तुत छन् । भिलेनको भूमिकामा रहेका पृथ्वीराज सुकुमारन भने मुखौटा लगाएर देखिएका छन् ।
टिजरको एक दृश्यमा ‘रोबोट’ तयार भइरहेको देखाइएको छ । यसले ‘रोबोट’सँग पनि अक्षय र टाइगरको भिडन्त हुने संकेत गर्छ । टिजरमा भीएफएक्स र ब्याकग्राउन्ड स्कोर सशक्त देखिन्छ । शुक्रबारबाट प्रदर्शनमा आउन लागेको ऋतिक रोशन स्टारर फिल्म ‘फाइटर’लाई लक्षित गर्दै ‘बडे मियाँ छोटे मियाँ’को टिजर सार्वजनिक गरिएको हो । यो फिल्म भने २०२४ को इदमा प्रदर्शन हुनेछ ।
अली अब्बास जफरद्वारा निर्देशित फिल्ममा सोनाक्षी सिन्हा, मानुषी छिल्लर, अलाया एफ र रोनित रोयको पनि मुख्य भूमिका छ । टिजर हेर्दा फिल्मको कथामा नयाँपन देखिएको छैन । देशको रक्षाका लागि आतंककारीसँग आर्मीको भिडन्तको कथामा यसअघि कयैन् बलिउड फिल्म बनिसकेका छन् । यद्यपि, अक्षय र टाइगर पहिलोपटक एकसाथ देखिएकाले दर्शकलाई रुचिकर हुनसक्छ ।
