यही माघ २६ गतेबाट प्रदर्शनमा आउन लागेको सिमोस सुनुवारद्वारा निर्देशित फिल्म ‘हात्तीछाप’को ट्रेलर सार्वजनिक गरिएको छ । ३ मिनेटको ट्रेलरले सामाजिक कथा उठाउँदै प्रेम र कमेडीको स्वाद पस्किएको छ । दयाहाङ राई र उपासना सिंह ठकुरीबीचको नोकझोंकपूर्ण प्रेम र सौगात मल्लको ‘बोत्तल राजा’ अवतार ट्रेलरको आकर्षक पक्ष हो । सौगातको संवाद बोल्ने शैली रोचक छ ।
ट्रेलरमा भूकम्प, बेरोजगारी र राजनीतिक कथालाई पनि उठाइएको छ । कमेडी रुचाउने दर्शकलाई फिल्मले आकर्षित गर्न सक्ने देखिन्छ । फिल्ममा बेनिशा हमाल, बुद्धि तामाङ, विजय बराल, कमलमणी नेपाल, पुष्कर गुरुङ, कविता आले, विल्सन विक्रम राई, विनोद न्यौपाने, भोलाराज सापकोटा, सुष्मा निरौला, रेयर राई, विशाल पहारी, सविन बास्तोला लगायतका पनि अभिनय छ ।
किरण नेपालीको प्रस्तुति रहेको ‘हात्तीछाप’मा प्रदीप भारद्वाजको लेखन, सुशन प्रजापतिको छायांकन, निमेष श्रेष्ठको सम्पादन, देव महर्जनको द्वन्द्व निर्देशन, उज्ज्वल सागर र आशिषको संगीत, हर्क साउदको रचना, मनोज श्रेष्ठको भिजुअल इफेक्ट्स तथा रामजी लामिछानेको कोरियोग्राफी छ । बलियो ‘स्टारकास्ट’का कारण यो फिल्मले बक्स अफिसमा राम्रो कमाई गर्ने प्रक्षेपण गरिएको छ ।
