आगामी फागुन ४ गतेबाट प्रदर्शनमा आउने तयारीमा रहेको फिल्म ‘जिग्री’को कमेडीयुक्त टिजर सार्वजनिक गरिएको छ । एक मिनेट लम्बाईको टिजर पैसाले उत्पन्न गराएको उल्झनमा केन्द्रित छ । एक समुहबाट बच्नका लागि दुई युवाले गरेको संघर्षलाई ट्रेलरमा रोचक ढंगले देखाइएको छ ।
अभयराज बराल र आकाश मगरको मुख्य भूमिका रहेको फिल्मलाई आकाश स्वयंले निर्देशन गरेका हुन् । फिल्ममा सुप्रिया राना, रोशन सुवेदी, जीवन बराल, वासुदेव खनाल, नवीन लम्साल, केदार श्रेष्ठ, दिवाकर घिमिरे, सुशीला लक्ष्मी महर्जन, मनिष व्याञ्जु, स्नेहा रसाइली, अर्जुन पौडेल, शंकर भण्डारी लगायतको पनि अभिनय छ ।
सुस्केरा आर्ट्सले लोकल सिनेमासँग सहकार्य गरेको निर्माण गरेको फिल्मका कार्यकारी निर्माता कुसुम थापा मगर र निर्माता कुमार श्रेष्ठ हुन् । फिल्ममा सुमित भट्ट र सोमित माझीको छायांकन, सरुन मानन्धरको सम्पादन र कलर, किशोर आचार्यको ध्वनि तथा सुवास पौडेल र भास्कर स्वाँरको संगीत छ ।
फिल्मले ठूलो महत्वकांक्षा बोकेर काठमाडौं आएका फरक व्यवहार र स्वभावका दुई युवाको कथा बोलेको छ । उनीहरुले महंगी र अभावमा पिल्सँदै काठमाडौँमा गरेको संघर्ष फिल्मको मुख्य कथा रहेको निर्देशक मगर बताउँछन् । सुस्केरा आर्ट्सले फिल्मको वितरण गर्दैछ ।
