सौरभ चौधरीको निर्देशनमा बनेको फिल्म ‘द अनब्रेकेबल अगस्त्य’को ‘एक्सन प्याक्ड’ टिजर सार्वजनिक गरिएको छ । आइतबार काठमाडौंमा एक कार्यक्रमका बीच सार्वजनिक गरिएको झण्डै दुई मिनेट लम्बाईको टिजरले फिल्मको कथावस्तुबारे महत्त्वपूर्ण खुलासा गर्छ । बदलाको कथालाई मियो बनाएर मधेशमा हुने गरेको अपराधको घटनामा फिल्म केन्द्रित रहेको टिजरले बुझाउँछ ।
टिजरमा आकर्षक पक्ष भनेको अभिनेता सौगात मल्लको चरित्रमा विविधता हो । उनलाई रोमान्टिक, एक्सन र मानसिक सन्तुलन गुमेको चरित्र गरी तीनवटा अवस्थामा देखाइएको छ । मलिका महत उनको प्रेमिका बनेकी छन् । टिजरको अन्तिममा मेशिनगन लिएर प्रस्तुत भएका नाजिर हुसेनको चरित्र पनि प्रभावशाली देखिन्छ । प्रमोद अग्रहरी र निश्चल बस्नेत पनि टिजरमा चित्रित छन् ।
निर्देशक चौधरी देशमा भैरहेको घटनालाई फिल्ममा उठाइएको दाबी गर्छन् । उनी भन्छन्, ‘यसमा कुनै एउटा भूगोलको मात्र नभइ समग्रमा देशमा भैरहेकै घटना छ । यसैले दर्शकलाई मनपर्छ भन्नेमा विश्वस्त छु ।’ सौगातले भने मानसिक सन्तुलन गुमेको चरित्र आफ्नो लागि एकदमै नयाँ अनुभव रहेको बताए । हेर्दा त्यो चरित्रमा दुःख देखिए पनि काम गर्दा रमाइलो भएको उनको भनाई छ ।
विश्व गौचन र अभिषेक चौधरी कार्यकारी निर्माता तथा प्रकाश मल्ल, अनिस तामाङ र विनोद पौडेल निर्माता रहेको फिल्ममा सञ्जय लामाको छायांकन, निर्देशक चौधरी स्वयंको लेखन, निमेष श्रेष्ठको सम्पादन, कविराज गहतराजको कोरियोग्राफी, श्री श्रेष्ठको द्वन्द्व निर्देशन र एसडी योगीको संगीत छ । फिल्मले बलात्कार र चेलिबेटी बेचविखनको कथालाई पनि उठाएको टिजरले संकेत गर्छ ।
