अभिनेता सलिनमान बनियाँले ५ वर्षपछि फिल्ममा कमब्याक गर्ने भएका छन् । २०७५ सालमा प्रदर्शन भएको फिल्म ‘यात्रा’पछि अभिनयमा निस्क्रिय देखिएका उनले फिल्म ‘यूनिभर्सिटी अफ गुन्डाज्’बाट कमब्याक गर्न लागेका हुन् । मंगलबार एक पोस्टरमार्फत् फिल्मको औपचारिक रुपमा निर्माण घोषणा गरिएको छ । पोस्टरमा सलिन ‘एक्सन मुड’मा देखिएका छन् भने उनको साथमा अभिनेता सलोन बस्नेत पनि चित्रित छन् ।
फिल्मलाई अभिनेता सलोन स्वयंले निर्माण गर्नेछन् । निर्देशक र अभिनेत्रीको भने टुंगो लाग्न बाँकी छ । सलोन-सलिना फिल्म्सको ब्यानरमा निर्माण हुन लागेको फिल्मलाई आगामी वर्ष छायांकनको तयारी गरिएको छ ।
दुई फिल्म ‘ए मेरो हजुर २’ र ‘यात्रा’मा एकसाथ काम गरेपछि सलिन र सलोनबीच हार्दिक सम्बन्ध छ । उनीहरुबीच अक्सर भेटघाट भैरहेको हुन्छ भने पारिवारिक रुपमा पनि दुवै नजिक छन् । लामो समयदेखि उनीहरुले फिल्मको विषयमा छलफल गरिरहेका थिए । फिल्म ग्याङस्टर कथावस्तुमा बन्न लागेको शीर्षकले संकेत गर्छ ।
‘यात्रा’पछि धेरै मेकरले फिल्म प्रस्ताव गर्दा पनि सलिनले काम गर्ने इच्छा देखाएका थिएनन् । बरु उनी व्यवसायमा केन्द्रित भएका थिए । अब भने उनको कमब्याकको टुंगो लागेको छ । ‘यूनिभर्सिटी अफ गुन्डाज्’मा उनी ‘एङ्ग्री योङम्यान’को रुपमा देखिनेछन् । यतिबेला उनले फिल्मको चरित्रका लागि विशेष तयारी गरिरहेका छन् ।
