नेपालपछि फिल्म ‘चित्रा’लाई अब अष्ट्रेलियामा प्रदर्शन गरिने भएको छ । फेब्रअरी ९ अर्थात् माघ २६ गते अष्ट्रेलियाको तासमानिया राज्यको भिलेज सिनेमाज् इस्टल्यान्डसमा फिल्मको पहिलो शो हुन लागेको हो । अष्ट्रेलियन ३० डलर टिकट मूल्य निर्धारण गरिएको फिल्मको शोमा स्थानीय मेयर पनि सहभागी हुने जनाइएको छ । यसपछि अष्ट्रेलियाको अन्य शहरमा फिल्मको प्रदर्शन गरिनेछ ।
फिल्मको शोका लागि निर्माता तथा अभिनेता सन्तोष अधिकारी अष्ट्रेलिया पुगिसकेका छन् । हुन त उनको बसोबास नै अष्ट्रेलियामा छ । फिल्मको निर्माण र प्रदर्शनका लागि उनी केही महिनादेखि नेपालमा थिए । फिल्मको माध्यमबाट नेपाललाई विश्वमा पर्यटकीय गन्तव्यको रुपमा चिनाउने उद्देश्य रहेको सन्तोष बताउँछन् । उनले यसलाई देश चिनाउने आफ्नो व्यक्तिगत प्रयास भनेका छन् ।
घनश्याम लामिछानेद्वारा निर्देशित फिल्ममा सन्तोषका अलावा सिम्रन खड्का, प्रमोद अग्रहरी, प्रकाश घिमिरे, अर्पण थापा, मेनुका प्रदान, शुभेच्छा खड्का, अञ्जना बराइली, आयुशी ढकाल (बाल कलाकार), कुमार गुरुङ, उज्ज्वल ढकालको पनि अभिनय छ । बाबु-छोरीको कथामा आधारित भएर बनेको फिल्ममा महेश पौडेलको छायांकन र मनिष गौतमको पटकथा एवं संवाद लेखन छ ।
