चर्चा र विवादकी पर्याय मानिएकी अभिनेत्री सुष्मा कार्की ४ वर्षयता फिल्ममा देखिएकी छैनन् । अब उनको विशेष भूमिका रहेको फिल्म ‘उपहार’ आगामी फागुन २५ गतेबाट प्रदर्शनमा आउने तयारीमा छ । फिल्ममा रेखा थापा, बेनिशा हमाल र पूजा शर्मा पनि मुख्य भूमिकामा छन् । पूजासँग वर्षौंदेखिको शीतयुद्धका बावजूद उनले एकसाथ काम गरेकाले फिल्मप्रति धेरैमा चासो देखिन्छ ।

एक कार्यक्रमको सिलसिलामा यतिबेला अष्ट्रेलियामा रहेकी सुष्माले ‘उपहार’को डबिङ गरेकी थिइनन् । नेपाल फर्किन समय लाग्ने भएपछि उनले उतैबाट डबिङ गरेकी छन् । उनले राजेश घिमिरेको प्राविधिक व्यवस्थापनमा यसै साता आफ्नो भागको डबिङ पूरा गरेकी हुन् । डबिङको दृश्यमा उनी आक्रोशित भावमा देखिएकी थिइन् । यसले फिल्ममा उनको झगडालु चरित्र रहेको बुझाउँछ ।

डबिङको क्रममा पत्रकार राजन घिमिरेसँगको कुराकानीमा सुष्माले ‘उपहार’मा आफू जोडिनुको कारण पनि खुलाएकी छन् । उनी भन्छिन्, ‘म रेखा थापाको सानैबाट फ्यान भएकाले पनि उहाँलाई एकदमै सम्मान गर्छु । उहाँले फिल्म अफर गर्नुभएपछि म खुसी-खुसी काम गर्न राजी भएको थिएँ । सबै कलाकारले एकदमै राम्रो काम गर्नुभएको छ । फिल्ममा मेरो एउटा राम्रो क्यारेक्टर छ ।’

ज्ञानेन्द्र देउजाको निर्देशन रहेको फिल्ममा मुकुन भुषाल, तेज गिरी, समर्पणजंग कार्की, अंशु महर्जन, आशा भुषाल, विनोद कुमार पौडेल आदिको पनि अभिनय छ । बलराम शाही ठकुरी कार्यकारी निर्माता रहेको फिल्मका निर्माता सुलभ प्रतिक र समीक्षा देउजा हुन् । फिल्ममा विष्णु कल्पित घिमिरेको छायांकन, अर्जुन पोखरेल र बाबुल गिरीको संगीत तथा मित्र डि. गुरुङको सम्पादन छ ।