आगामी फागुन २५ गते (महाशिवरात्री)बाट प्रदर्शनमा आउने तयारीमा रहेको फिल्म ‘रङ्गेली’को दोस्रो गीत सार्वजनिक गरिएको छ । पृथक शैलीमा तयार पारिएको ‘दुल्हा दुल्हन’ बोलको गीतमा निशान भट्टराईको स्वर, सविन एकतारेका शब्द रचना तथा सुशान्त गौतमको संगीत छ । विवाहको परिवेशमा खिचिएको गीतमा अभिनेता विजय बराल कमेडी शैलीमा गाउँदै र नृत्य गर्दै प्रस्तुत छन् ।
गीतमा दयाहाङ राई र मिरुना मगरको थारु संस्कृतिअनुसार विवाहको दृश्य समेटिएको छ । एक दृश्यमा उनीहरुलाई बधाई दिन अर्पण थापा ग्याङस्टर लुक्समा देखिएका छन् । मैथिली भाषा पनि प्रयोग गरिएको गीतको अडियो र भिडियो रोचक छ । निर्देशक अर्जुन सुवेदीले फिल्ममा यो गीत महत्त्वपूर्ण रहेको बताएका छन् । एक महिनाअघि फिल्मको टिजर पनि सार्वजनिक भैसकेको छ ।
अर्जुन सुवेदी स्वयंको लेखन रहेको फिल्ममा प्रवीण खतिवडा, रमेश बुढाथोकी, शेखर चापागाईं, प्रभाकर न्यौपाने, सन्तोष सरकार लगायतको पनि अभिनय छ । फिल्मको कार्यकारी निर्मातामा जीतेन्द्र खतिवडा र अनुज जङ्ग थापा, निर्मातामा संसार चौलागाईं र रमेश भट्टराई वशिष्ठ, सह-निर्मातामा युवक कार्की र शिव शङ्कर चौलागाईँ तथा एशोसियट निर्मातामा विवेक खड्का (योलो) छन् ।
