दशैं विदा फिल्म रिलिजका लागि सबैभन्दा उपयुक्त मानिन्छ । लामो विदा रहने भएकाले त्यसको फाइदा फिल्मको व्यापारमा पर्ने विश्वास मेकरहरुमा छ । यसैले वर्षेनि दशैं विदामा फिल्म रिलिज गर्न निर्माताहरुबीच ठूलै रस्साकस्सी हुने गर्छ । आगामी दशैंका लागि पनि अहिलेदेखि फिल्मको प्रदर्शन मिति घोषणा गर्न हानाथाप भइरहेको छ । चारवटा फिल्मले अर्को दशैं रोजिसकेका छन् ।

दीपाश्री निरौलाको निर्देशन रहने ‘छक्का पञ्जा ५’, सन्तोष सेनले निर्देशन गर्न लागेको ‘बलिदान’, दिनेश राउतले निर्देशन गर्ने ‘गाउँ नै रमाइलो’पछि अब आकाश बराल र सजन काफ्लेको संयुक्त निर्देशन रहने फिल्म ‘बेहुली फ्रम मेघौली’ पनि अर्को दशैंमा आउने तय भएको छ । सोमबार फिल्मको वितरण अधिकार लिँदै अशोक शर्माले २०८१ को दशैंमा फिल्म प्रदर्शन हुने घोषणा गरेका हुन् ।

यी चारवटै फिल्मले दशैंलाई प्रदर्शन निश्चित गरे पनि यकिन मिति तोकिसकेका छैनन् । जसले गर्दा सहमतिमा रिलिजको सम्भावना प्रवल देखिन्छ । र, दशैंसम्म कुन-कुन फिल्म तयार हुन्छन्, त्यसले पनि रिलिजको निर्क्यौल गर्नेछ । तथापि, यतिबेलाको सिनारियो हेर्दा आगामी दशैं ठूला मेकरको कब्जामा रहने छनक देखिएको छ । दशैंको एक हप्ताअघि भने फिल्म ‘ह्रस्व दीर्घ’ रिलिज हुँदैछ ।

आगामी फागुन दोस्रो साताबाट छायांकन सुरु हुन लागेको ‘बेहुली फ्रम मेघौली’मा स्वस्तिमा खड्का, निश्चिल बस्नेत, विजय बरालले मुख्य भूमिकामा काम गर्दैछन् । ब्ल्याक हर्स पिक्चर र मेघौली फिल्म्सको संयुक्त भेन्चरमा बन्न लागेको फिल्मको निर्मात्री स्वस्तिमा हुन् । शीर्षकले नै फिल्मको कथा मेघौली गाउँ (चितवन)मा आधारित रहेको बुझाउँछ । फिल्ममा आकाश र सजनको लेखन छ ।