अभिनेत्री केकी अधिकारीको मुख्य भूमिका रहेको फिल्म ‘बोक्सीको घर’को फर्स्टलुक पोस्टर सार्वजनिक गरिएको छ । वसन्त पञ्चमीको अवसर पारेर बुधबार सार्वजनिक पोस्टरमा एक महिलालाई रातो साडीमा कपाल फिजाएर पिपलको बोट अगाडि उभिएको अवस्थामा चित्रित गरिएको छ । र, पिपलको बोटमाथि ठूलो आकारमा पूर्णिमाको चन्द्रमालाई देखाइएको छ । पोस्टरको कन्सेप्ट डिजाइन आकर्षक देखिन्छ ।
सुलक्षण भारतीको निर्देशन रहेको फिल्ममा केकीका अलावा सुपला सापकोटा, श्वेच्छा राउत, सुलक्षण भारती, रमा थपलिया, सुष्मा निरौला, सबिन बास्तोला लगायतको पनि अभिनय छ । केकी अधिकारी फिल्म्सको प्रस्तुति रहेको फिल्मको निर्मातामा केकीका बुबा बद्री अधिकारी छन् भने कार्यकारी निर्माता राज घिमिरे हुन् । यो फिल्म आगामी बैशाख १४ गतेबाट प्रदर्शनमा आउँदैछ ।
निर्देशक भारती स्वयंको स्क्रिप्ट तथा सम्पादन रहेको फिल्ममा शिवराम श्रेष्ठको छायांकन, कुमार महर्जनको द्वन्द्व निर्देशन तथा लोकेश बज्राचार्यले सम्पादन छ । नेपाल प्रदर्शनपछि फिल्मलाई अन्तर्राष्ट्रिय फेस्टिभलमा समेत लैजाने योजनामा निर्माण टिम छ । २०७३ सालमा मण्डला थिएटरमा मञ्चन भएको नाटक ‘बोक्सीको घर’मा आधारित भएर फिल्म बनेको हो ।
