यही फागुन अन्तिमबाट छायांकनको तयारी भइरहेको फिल्म ‘कार्साङ’मा ‘राष्ट्रिय अवार्ड विजेता’ दीया मास्केको प्रवेश भएको छ । बुधबार सरस्वती पूजाको अवसर पारेर बौद्ध धर्मअनुसार स्क्रिप्ट पूजा गर्दै फिल्ममा दीयाको प्रवेशबारे जानकारी गराइएको हो । फिल्ममा यसअघि दयाहाङ राई, बुद्धि तामाङ, शिल्पा मास्के, सुरक्षा पन्त, माओत्से गुरुङ, पुष्कर गुरुङ अनुबन्ध भैसकेका छन् ।

यो फिल्मबाट सृजना निङ्लेकु र छिरिङ शेर्पाले डेब्यू गर्दैछन् । सम्राट क्षेत्री, छुकी शेर्पा, कर्मा शेर्पा लगायतको पनि अभिनय रहने फिल्मलाई यम शेर्पाले निर्देशन गर्नेछन् भने उनी स्वयंको लेखन छ । यार्सा फिल्म्स र पुरुषोत्तम प्रधान फिल्म्सको सहकार्यमा बन्न लागेको फिल्मको निर्मातामा गोविन्द बोहोरा छन् । शेर्पा समुदायको सामाजिक कथावस्तुमा फिल्म आधारित हुने जनाइएको छ ।

पुरुषोत्तम प्रधानको छायांकन रहने फिल्मको बाह्रबिसे नगरपालिका र भोटेकोसी गाउँपालिकाका विभिन्न स्थानमा छायाकंन हुनेछ । दीलिप पन्त प्रोडक्शन म्यानेजर रहेको फिल्मको अन्तर्राष्ट्रिय प्रदर्शन अधिकार सेभेन सिज इन्टरटेनमेन्टले खरिद गरिसकेको छ । नेपालभित्र भने फिल्मको वितरण आरआर फिल्म्सले गर्नेछ । फिल्मलाई आगामी वर्ष सार्वजनिक प्रदर्शन गर्ने लक्ष्य राखिएको छ ।