सौरभ चौधरीको लेखन तथा निर्देशनमा बनेको फिल्म ‘अगस्त्य’को ट्रेलर सार्वजनिक गरिएको छ । बिहीबार एक कार्यक्रमका बीच सार्वजनिक ३ मिनेटको ट्रेलर एक्सन दृश्यले भरिएको छ । ट्रेलरको एउटा पार्टमा अभिनेताद्वय सौगात मल्ल र नाजिर हुसेनबीचको मित्रता देखाइएको छ भने अर्को पार्टमा दुवैलाई एक्सन अवतारमा प्रस्तुत गरिएको छ । दुवैको एक्सन छरितो र बुलन्द देखिन्छ ।
ट्रेलरले फिल्म बदलाको कथामा आधारित रहेको प्रष्ट बुझाउँछ । मानसिक सन्तुलन गुमेको चरित्रमा सौगात सशक्त देखिएका छन् । अभिनेता प्रमोद अग्रहरीको चरित्रचित्रण पनि ट्रेलरमा प्रभावशाली छ । उनको ‘भ्वाइस ओभर’ले नै ट्रेलर उठाएको छ । अभिनेत्री मलिका महत कम ‘स्क्रिन स्पेश’मा पनि अर्थपूर्ण देखिन्छिन् । ट्रेलरको अन्तिममा भने अभिनेता निश्चल बस्नेतलाई उतारिएको छ ।
ट्रेलरको बलियो पक्ष भनेको ब्याकग्राउन्ड म्यूजिक हो । एक्सन कोरियोग्राफी पनि सशक्त छ । ट्रेलरले फिल्मप्रति दर्शकको अपेक्षा चुल्याउन सक्ने देखिन्छ । यही फागुन १८ गतेबाट प्रदर्शनमा आउन लागेको फिल्ममा विजय बराल, रवीन्द्र झा, बेन बस्नेत, शिशिर वाङ्गदेल, सिम्रन खड्का, प्रकाश दाहाल, गजेन्द्र त्रिपाठी आदिको पनि अभिनय रहेको छ । फिल्मले मधेशको कथा उठाएको छ ।
फिल्ममा प्रकाश मल्ल, अनिष तामाङ र बिनोद पौडेल निर्मातामा छन् भने कार्यकारी निर्माता विश्व गौचन र अभिषेक चौधरी हुन् । सञ्जय लामाको छायांकन रहेको फिल्ममा निमेष श्रेष्ठको सम्पादन, श्री श्रेष्ठको द्वन्द्व निर्देशन, कविराज गहतराजको कोरियोग्राफी, सौरभ शर्मा र भाष्कर स्वाँरको ब्याकग्राउन्ड म्यूजिक तथा एसडी योगीको संगीत छ । फिल्मलाई दुई श्रृंखलामा निर्माण गरिँदैछ ।
