‘केटी हराएको सूचना’ शीर्षकमा फिल्म निर्माण हुने भएको छ । दीपेन्द्र गौचनको लेखन तथा निर्देशनमा बन्न लागेको यो फिल्मको सोमबार स्क्रिप्ट पूजा गर्दै मुख्य कलाकारको बारेमा जानकारी गराइयो । फिल्ममा अभिनेता नाजिर हुसेन र अभिनेत्री सृष्टि श्रेष्ठको जोडी बाँधिने भएको छ । उनीहरुले पहिलोपटक एकसाथ काम गर्न लागेका हुन् । दुवै फिल्मलाई लिएर उत्साहित देखिएका छन् ।
ट्राइसिटी पिक्चर्सको ब्यानरमा निर्माण हुन लागेको फिल्मको निर्माता नकिम उद्दिम हुन् । उनी नेपालकै सबैभन्दा ठूलो मल्टीप्लेक्स चेन क्यूएफएक्सका सञ्चालक हुन् भने यसअघि उनले ‘द म्यान फ्रम काठमाडौं’, ‘सुन्तली’, ‘सानो संसार’ र ‘कागबेनी’ फिल्मको पनि निर्माण गरिसकेका छन् । उद्दिम ५ वर्षपछि फिल्म निर्माणमा फर्किएका हुन् । फिल्मको यही बिहीबारदेखि छायांकन सुरु हुँदैछ ।
अम्बर महर्जन छायांकार रहने फिल्मलाई काठमाडौँ र जनकपुरमा छायांकन गरिने जनाइएको छ । निर्देशक गौचनले करिब तीन दशक अगाडि बालविवाहको विषयमा टेलिसिरियल ‘उजेली’ निर्देशन गरेका थिए । उनी क्याम्बोडियन नागरिक हुन् । उनले केही क्याम्बोडियन फिल्मको निर्देशन तथा निर्माण पनि गरेका छन् । शीर्षकले नै ‘केटी हराएको सूचना’ महिला प्रधान हुने संकेत गर्छ ।