महाशिवरात्रीको दिन पारेर भोलि शुक्रबारबाट प्रदर्शनमा आउन लागेको ज्ञानेन्द्र देउजाद्वारा निर्देशित फिल्म ‘उपहार’ले प्रिमियरमा अब्बल प्रतिक्रिया प्राप्त गरेको छ । बिहीबार दिउँसो काठमाडौंमा आयोजित प्रिमियरमा पुगेका फिल्मकर्मीहरुले एउटा ‘प्याकेज’को फिल्म बनेको भन्दै प्रशंसामा शब्द खर्चिएका थिए । अधिकांशले फिल्मको कथावस्तु र कलाकारको अभिनयको खुलेर प्रशंसा गरे ।

अभिनेता किरण केसीले फिल्म उत्कृष्ट बनेको प्रतिक्रिया दिए । ‘ज्ञानेन्द्र देउजा सानो-सानो कुरालाई पनि केलाएर प्रस्तुत गर्न सक्ने खुबी भएको निर्देशन हो । ‘उपहार’मा हरेक कलाकारहरुको काम राम्रो छ । पूजा र बेनिशाले गजब अभिनय गरेका छन् । शिशिर राणा भाईलाई विशेष बधाई दिन चाहन्छु । उसले साह्रै मीठो अभिनय गरेको छ । सिचुएशनल कमेडीले धेरै हँसाउँछ,’ उनले भने ।

अभिनेता रमेश उप्रेतीलाई भने ‘उपहार’ यस वर्षकै उत्कृष्ट फिल्म लागेको छ । ‘हरेक कलाकारहरुको अभिनय राम्रो छ । फिल्ममा मनोरञ्जनसँगै सन्देश पनि छ,’ उनले भने, ‘यसमा रेखा थापाको आफ्नो पन निस्किएको छ । रेखामा दमदार मेकरको पनि लक्षण देखिएको छ । यो फिल्म हेर्दा समय र पैसा खेर जान्न । मैले धेरैपछि गजबको नेपाली फिल्म हेरेँ । यो वर्षकै उत्कृष्ट फिल्म लाग्यो ।’

अभिनेता शिवहरी पौडेलले फिल्ममा हुनुपर्ने सबै गुण ‘उपहार’मा रहेको धारणा व्यक्त गरे । निर्देशक शोभित बस्नेतले भने धेरैपछि वास्तविक नेपाली फिल्म हेर्न पाएको बताए । दर्शकलाई मनपर्ने फिल्म बनेको उनको दाबी छ । त्यस्तै, निर्देशक तथा निर्मात्री कृषा चौलागाईं ‘उपहार’लाई ‘प्याकेज’को फिल्म भन्न रुचाउँछिन् । रेखा थापाका फ्यानहरुका लागि राम्रो उपहार हुने उनको विश्वास छ ।

निर्देशक नवल नेपाल ‘उपहार’लाई एउटा परिपक्व फिल्म मान्छन् । उनी भन्छन्, ‘एउटा परिपक्व निर्देशकको परिपक्व फिल्म हो यो । यसमा हाँसो, रोदन सबैथोक छ । समग्रमा ‘प्याकेज’को फिल्म हो ।’ अर्का निर्देशक सुदर्शन थापाले फिल्म राम्रो बनेको प्रतिक्रिया दिँदै विषयवस्तु सबैभन्दा बलियो रहेको दाबी गरे । योखालको फिल्म नेपाली दर्शकले वर्षौंदेखि खोजिरहेको उनको भनाई थियो ।

फिल्मकी मुख्य अभिनेत्री पूजा शर्माले आफ्नो लागि यस वर्षकै उत्कृष्ट फिल्म रहेको दाबी गरिन् । ‘स्क्रिप्टभन्दा अझ बलियो लाग्यो फिल्म । यो फिल्म हेर्न छुटाइयो भने सबथोक छुटाएको बराबर हुनेछ । मेरो लागि यस वर्षकै उत्कृष्ट फिल्म हो,’ उनले खुसी हुँदै भनिन् । प्रिमियरमा प्राप्त सकारात्मक प्रतिक्रियाले ‘उपहार’की अर्की अभिनेत्री बेनिशा हमाल पनि हर्षित भावमा देखिएकी थिइन् ।