अभिनेता प्रदीप खड्काले वर्षमा एक वा दुईवटा फिल्ममा मात्र काम नगर्ने नीति लिएका थिए । तर, यस वर्ष उनले सम्झौता गरेको फिल्मको सूची हेर्ने हो भने अर्को वर्ष उनलाई सेड्युल मिलाउनै समस्या पर्न सक्छ । उनले दशैंयता लगातार रुपमा फिल्म सम्झौता गरिरहेका छन् । यसबीच, प्रदीप अर्को फिल्ममा जोडिएका छन् । उनले निर्देशक प्रदीप शाहीको फिल्ममा काम गर्न लागेका हुन् ।
शनिबार प्रदीपको जन्मदिन परेको थियो । सोही अवसरमा उनले पोखरामा फिल्म सम्झौता गरेका हुन् । फिल्मको शीर्षक भने तय भइसकेको छ । फिल्ममा प्रदीपको जोडीमा एक स्थापित अभिनेत्रीलाई समेत निश्चित गरिसकिएको छ । केही दिनमा अभिनेत्रीको नाम सार्वजनिक गर्ने तयारीमा निर्माण टिम छ । शाई प्रोडक्सन नेपाल र ह्याम्साएर एकाउन्टेनको सहकार्यमा फिल्म निर्माण हुनेछ ।
फिल्मको कथा निर्देशक शाहीले लेखेका हुन् । साई-फाई जोम्बी थ्रिलर जनरामा निर्माण हुन लागेको फिल्मको कार्यकारी निर्मातामा विनोद सुवेदी खत्री ‘क्षितिज’ छन् । फिल्ममा मिथिकल इलेमेन्टहरु पनि रहने निर्देशक शाहीको भनाई छ । फिल्म ‘गोर्खा : बिनिथ द ब्रेभरी’बाट निर्देशनमा डेब्यू गरेका शाहीको दोस्रो फिचर फिल्म ‘अन्तिम संस्कार’ थियो, जुन गत असारमा रिलिज भएको थियो ।
