शोभित बस्नेतद्वारा निर्देशित फिल्म ‘बद्री बहादुर’को पहिलो गीत सार्वजनिक गरिएको छ । सोमबार काठमाडौंका एक कार्यक्रमका बीच सार्वजनिक ‘पुलिस दाई’ बोलको गीतमा अभिनेत्री पूजा शर्मा र अभिनेता सलोन बस्नेत नृत्य गर्दै प्रस्तुत छन् । सलोन पुलिसको भेषमा देखिएका छन् । जयकिशन बस्नेत, राजीव जंग बस्नेत, शोभित बस्नेत लगायतका कलाकारलाई पनि गीतमा देख्न सकिन्छ ।
गीतमा शिवम अधिकारीको शब्द, टंक बुढाथोकीको संगीत तथा टंक र मिलन नेवारको युगल स्वर छ । शिव विकको कोरियोग्राफी रहेको गीतमा विनोद सापकोटाको छायांकन छ । पूजा र सलोन फिल्मको यही गीतमा मात्रै देखिनेछन् । चलचित्र विकास बोर्डका सदस्य तथा सञ्चारकर्मी रवि अधिकारी कार्यकारी निर्माता रहेको फिल्म आगामी चैत २३ गतेबाट सार्वजनिक प्रदर्शनमा आउँदैछ ।
जयकिशन बस्नेत, एलिना गुरुङ, छुल्ठिम गुरुङ, राजीव जंग बस्नेत, धिरेन शाक्य, वर्षा चौलागाई आदिको अभिनय रहेको फिल्ममा विनोद सापकोटाको छायांकन, टंक बुढाथोकी र उजन नेम्वाङको संगीत, रामकाजी घिमिरे लेखन, शिव बिकको नृत्य निर्देशन, शंकर महर्जनको द्वन्द्व निर्देशन र समिर मियाँ सम्पादन छ । विजय गोपाल दली प्रस्तुतकर्ता र मिथुन भोटे फिल्मको निर्माता हुन् ।
