यही चैत २३ गतेबाट प्रदर्शन हुन लागेको शोभित बस्नेत निर्देशित फिल्म ‘बद्री बहादुर’को ट्रेलर सार्वजनिक गरिएको छ । बिहीबार काठमाडौंमा एक कार्यक्रमका बीच सार्वजनिक ३ मिनेट २० सेकेण्ड लम्बाईको ट्रेलर कमेडी शैलीमा तयार पारिएको छ । भारतका चर्चित कमेडियन कपिल शर्माले दिएको शुभकामना सन्देश समेत राखिएको ट्रेलरमा दुईअर्थी संवादलाई प्राथमिकता दिइएको छ ।
सञ्चारकर्मी तथा चलचित्र विकास बोर्डका सदस्य समेत रहेका रवि अधिकारी कार्यकारी निर्माता रहेको फिल्ममा जय किसन बस्नेत, शोभित बस्नेत, एलिना गुरुङ, छुल्ठिम गुरुङ, राजीव जंग बस्नेत, धिरेन शाक्य, उत्तम केसी, वर्षा चौलागाई लगायतको अभिनय छ । फिल्मको एक गीतमा अभिनेता सलोन बस्नेत र अभिनेत्री पूजा शर्माले नृत्य गरेका छन् । विनोद सापकोटाले फिल्म खिचेका हुन् ।
एबी पिक्चर्स फार्म र सलोन-सलिना फिल्म्सको संयुक्त निर्माण रहेको फिल्मको प्रस्तुतकर्ता विजय गोपाल दली तथा निर्माता मिथुन भोटे हुन् । फिल्ममा टंक बुढाथोकी र उजन नेम्वाङको संगीत, रामकाजी घिमिरे लेखन, शंकर महर्जनको द्वन्द्व निर्देशन र समिर मियाँ सम्पादन रहेको छ । काठमाडौं, लमजुङ्ग, धरान र संखुवासभामा खिचिएको फिल्मलाई आरआर फिल्म्सले वितरण गर्दैछ ।
निर्देशक बस्नेत ‘बद्री बहादुर’ शिक्षा दिने उद्देश्यले नबनाएको बताउँछन् । कार्यक्रममा उनले भने, ‘यो फिल्म एकदमै रमाइलो छ । दर्शकले हेरुन्जेल मज्जाले हाँस्नु हुन्छ । मान्छे अनेक तनावमा हुन्छन् अनि फिल्म शिक्षा र सन्देश दिने किन बनाउने ? दर्शकले सवा २ घण्टा रमाइलो गरुन् भनेर नै फिल्म बनाएको हुँ ।’ फिल्मलाई शुभकामना दिएकोमा कपिल शर्मालाई पनि उनले धन्यवाद दिए ।
