अभिनेता अभयराज बरालको निर्माण तथा निर्देशनमा तयार भएको फिल्म ‘अर्ध पागल’को फर्स्टलुक पोस्टर सार्वजनिक गरिएको छ । पोस्टरमा पात्रहरुको मनोभाव दर्शाइएको छ । दुईजना मिल्ने साथी काठमाडौँदेखि लमजुङ्ग (घले गाउँ)सम्मको यात्रामा निस्कने क्रममा उनीहरुबीच आ-आफ्नो प्रेमिकालाई लिएर उत्पन्न मानसिक तथा शारीरिक द्वन्द्वमा फिल्म आधारित रहेको जनाइएको छ ।
यसमा निर्देशक बराल र प्रकाश भुजेल मुख्य भूमिकामा छन् भने ममता लामिछाने, अञ्जु अधिकारी, संगीता खालिङ राई, संगीता राई, हिना कोइराला, सोबिता अधिकारी, दिक्षा ढकाल लगायतको पनि अभिनय छ । समर्पण रेग्मीको छायांकन रहेको फिल्ममा कृष्ण भण्डारीले सम्पादन छ । एक दर्जनभन्दा बढी फिल्ममा अभिनय गरिसकेका अभयले यहीबाट निर्देशनमा डेब्यू गरेका हुन् ।
फिल्मलाई व्यवसायिक रुपमा हलमा प्रदर्शनभन्दा पनि विभिन्न राष्ट्रिय तथा अन्तर्राष्ट्रिय फेस्टिभलमा सहभागी गराउने उद्देश्य रहेको निर्देशक बरालले बताएका छन् । उनी अभिनीत पछिल्लो फिल्म ‘जिग्री’ यही चैत ३ गते प्रदर्शनमा आएको थियो । उनले नाटकसँगै ‘झिँगेदाउ’, ‘सेल्फी किंग’, ‘गाँठो’, ‘अमेरिका ब्वाइज्’, ‘कुम्भ करण’, ‘होस्टेल रिर्टन्स’ लगायतका फिल्महरुमा अभिनय गरेका छन् ।
