सुयोग गुरुङको निर्देशनमा बनेको फिल्म ‘फर्की फर्की’को फर्स्टलुक पोस्टर सार्वजनिक गरिएको छ । फिल्मका अभिनेता अनमोल केसीको जन्मदिन पारेर शनिबार सार्वजनिक पोस्टरमा उनलाई मात्र स्थान दिइएको छ । उनी दुई फरक अवस्थामा चित्रित छन् । एउटामा सोचमग्न देखिएका उनी अर्कोमा कतै हिँडिरहेका देखिन्छन् । पोस्टरमा प्रयोग केही बिम्बले उनको चरित्रबारे संकेत गर्छ ।
सामाजिक सञ्जालमा पोस्टर सेअर गर्दै अनमोलले ‘यो जादूको समय हो’ भनेर उल्लेख गरेका छन् । उनी अगाडि लेख्छन्, ‘सबैलाई यो देखाउनका लागि अब म प्रतिक्षा गर्न सक्दिनँ कि हामीले केमाथि काम गरिरहेका छौं ।’ यसले फिल्मप्रति उनको उत्साह बोल्छ । पोस्टर हेर्दा फिल्म ‘टाइम ट्राभल’को कथामा बनेको हुनसक्ने देखिन्छ । यो फिल्म आगामी जेठ १० गतेबाट प्रदर्शनमा आउँदैछ ।
ओम प्रकाश अग्रवाल र रोहित अधिकारीको निर्माण रहेको फिल्ममा जसिता गुरुङ, कृष्ण मल्ल, निर्मल शर्मा, रवि काफ्ले, समृद्धि अर्याल लगायतको पनि अभिनय छ । फिल्ममा मनोज ओली र रामु न्यौपाने सह-निर्मातामा छन् भने मोती कार्की र अनिरुद्र गिरी कार्यकारी निर्माता हुन् । निर्देशक गुरुङ स्वयंको कथा र पटकथा लेखन रहेको फिल्मलाई नरेन्द्र मैनालीले छायांकन गरेका हुन् ।
