अनिल बुढा मगरको निर्देशनमा तयार भएको फिल्म ‘घरज्वाइँ’को क्यारेक्टर पोस्टर सार्वजनिक गरिएको छ । ग्रामीण परिवेशलाई पृष्ठभूमिमा राखेर तयार पारिएको दुईवटा पोस्टरमध्ये एउटामा अभिनेता दयाहाङ राई र अभिनेत्री मिरुना मगर प्रस्तुत छन् । डोको बोकेर हिँडिरहेका उनीहरु दम्पतीको भूमिकामा रहेको प्रष्ट बुझिन्छ । अर्को पोस्टरमा दयाहाङ काँधमा बन्दुक भिरेर चित्रित छन् ।

घरज्वाइँ बस्ने परम्परामा आधारित भएर बनेको फिल्ममा पुष्कर गुरुङ, शिशिर बाङ्देल, भोलाराज सापकोटा, कविता आले, बुद्धि तामाङ, खड्क बहादुर पुन (खबपु), राज थापा, शिला आले, अनु थापा, विना थापामगर, सोनाम लामा, विवेश बुढा मगर आदिको पनि अभिनय छ । आगामी असार २८ गतेबाट प्रदर्शनमा आउन लागेको फिल्मको पूर्वी रुकुम तकसेरामा छायांकन गरिएको हो ।

जिएम मुभिजको ब्यानरमा निर्माण भएको फिल्ममा सुसन प्रजापतिको छायांकन, कृष्ण भण्डारीले सम्पादन र रामजी लामिछानेको कोरियोग्राफी रहेको छ । निर्देशक मगरसहित विनोद खतिवडा र सुभाष कोइरालाको संयुक्त लेखन रहेको फिल्ममा जनक घर्ती मगर निर्मातामा छन् । रोहित कट्टेल र रत्न श्रेष्ठको कम्पनी आरआर फिल्म्सले फिल्मको देशभर वितरणको अधिकार लिएको छ ।