सुपरस्टार सलमान खानलाई बलिउडमा ईदको पर्याय मानिन्छ । किनकि, उनका अक्सर फिल्म ईदमा नै रिलिज हुन्छन् । र, बक्स अफिसमा ठूलो रेकर्ड बनाउँछन् । तर, यसपटकको ईदमा उनको फिल्म छैन । यसैले बलिउडमा माहोल पनि सुखद् देखिएको छैन । यद्यपि, ईदमा दुई ठूला फिल्म ‘बडे मियाँ छोटे मियाँ’ र ‘मैदान’ प्रदर्शन हुँदैछ । तर, दुवै फिल्मको माहोल निराशाजनक छ ।
यसअघि दुवै फिल्म अप्रिल १० (बुधबार)बाट रिलिज हुने तय भएकोमा अब ११ अप्रिल (बिहीबार)बाट प्रदर्शनमा आउने भएका छन् । किनकि, यसपटक ईद ११ अप्रिलमा परेको छ । अप्रिल १० मा भने दुवै फिल्मको पेड प्रिमियर राखिएको छ । यसपटकको ईदमा सूर्य अस्ताउने र उदाउने समय परिवर्तन हुने भएपछि यी दुवै फिल्मलाई बिहीबारबाट पूर्ण रुपमा हलमा रिलिज गर्न लागिएको हो ।
तर, दुवै फिल्ममा ठूला स्टार भए पनि बुकिङ कमजोर देखिएको छ । शनिबारबाट दुवै फिल्मको बुकिङ खुलेको थियो । इन्डियन एक्सप्रेसका अनुसार, अक्षय कुमार र टाइगर श्राफ स्टारर ‘बडे मियाँ छोटे मियाँ’ले मंगलबार बिहानसम्म भारतमा १६ हजार टिकट बेचेर ३८ लाख कमाई गरेको छ । त्यस्तै, अजय देवगनको ‘मैदान’ले १२ हजार टिकट बेच्दै २७ लाख कमाएको दाबी गरिएको छ ।
‘मैदान’को तुलनामा ‘बडे मियाँ छोटे मियाँ’ले ठूलो मात्रामा शोज पाएको छ । थ्रीडीसहित तेलुगु तथा तमिल संस्करणमा पनि रिलिज हुन लागेको फिल्मले भारतभर ४ हजार शोज पाएको छ भने ‘मैदान’लाई ३ हजार आसपास शोज प्राप्त छ । बुकिङको ट्रेन्ड हेर्दा यी दुवै फिल्मको ओपनिङ कमजोर हुने देखिन्छ । यो अवस्थामा दुवै फिल्मलाई बलियो ‘वर्ड अफ माउथ’को आवश्यकता पर्नेछ ।
