घनश्याम लामिछानेको निर्देशनमा बनेको फिल्म ‘लण्डन टू पेरिस’को पहिलो रोमान्टिक गीत ‘खुल्ला आकाश’ सार्वजनिक गरिएको छ । मंगलबार काठमाडौंमा एक कार्यक्रमबीच सार्वजनिक गीतमा फिल्मकी मुख्य अभिनेत्री साम्राज्ञी आरएल शाह र नव-अभिनेता निश्चल खड्का फिचर्ड छन् । गीतले उनीहरुको प्रेमभाव बोल्छ । यस गीतमा हर्कुलस बस्नेतको शब्द रचना, संगीत तथा स्वर छ ।
आगामी जेठ २५ गते प्रदर्शनमा आउन लागेको फिल्ममा साम्राज्ञी र निश्चलसँगै कबीर खड्का, गरिमा शर्मा, रुष्मा थापा, मनिश श्रेष्ठ र मनिष गान्धीको पनि अभिनय छ । निश्चल र गरिमा दुवैको यो डेब्यू फिल्म हो । फिल्ममा प्रदीप भारद्वाजको कथा, पटकथा तथा संवाद लेखन छ । गत फागुनमा मुम्बईको स्टुडियोमा फिल्मको पेरिसको भाग खिचिएको थियो, जुन अंश गीतमा पनि समावेश छ ।
एबी इन्टरनेशनलको प्रस्तुति रहेको फिल्ममा गौतम प्रोडक्शन तथा अर्चिड भेस फिल्म्सले निर्माणमा सहकार्य गरेको छ । परी राना, अमित बस्नेत, आरोन बस्नेत र एरियाना बस्नेत निर्माता रहेको फिल्ममा सनिश खकुरेल सह-निर्मातामा छन् । त्यस्तै, अंकित गौतम कार्यकारी निर्माता हुन् । फिल्ममा अभेद परवको छायांकन, हर्कुलशसहित एसडी योगी, बियोण्ड तथा सलिन मगरको संगीत छ ।
