गत वर्षको सर्वाधिक सफल फिल्म ‘जारी’बाट निर्देशनमा डेब्यू गरेका कवि तथा आख्यानकार उपेन्द्र सुब्बाले दोस्रो फिल्मको रुपमा ‘मनसरा’ बनाएका छन्, जुन यही बैशाख २१ गतेबाट प्रदर्शनमा आउँदैछ । ‘जारी’लाई लिम्बू समुदायमा प्रचलित जारी प्रथामा आधारित भएर बनाएका उनले ‘मनसरा’मा अन्तरजातीय सम्बन्धको कथा उठान गरेका छन् । ट्रेलर रिलिजपछि फिल्मप्रति धेरैको अपेक्षा बढेको छ ।
निर्देशक सुब्बा आफूले छ्या भन्ने फिल्म नबनाउने दाबी गर्छन् । शनिबार पोखरामा चलचित्र पत्रकार संघ, कास्की शाखाले आयोजना गरेको पत्रकार सम्मेलनमा उनले भने- ‘फिल्ममा मिश्रित समाजको कथा छ । हरेक पात्रमा दर्शकले आफूलाई पाउनेछन् । सामाजिक विषयवस्तुमा मेरो रुचि भएकाले पनि फिल्ममार्फत् त्यसलाई प्रस्ततु गर्न खोजेको छु । फिल्म छ्या भन्ने बनाएको छैन । पत्याउने फिल्म नै बनेको छ । फरकधारको फिल्म बनाउने प्रयास हो ।’
निर्देशक सुब्बाले मनसरा धानको नाम रहेको पनि प्रष्ट पारे । यो धानको विशेषता मन परेरै फिल्मको कथा बुनेको उनको भनाई थियो । ‘मनसरा पूर्वतिर पाइने धान हो । यसको ठाँट अलि कडा हुन्छ । वरिपरि अन्य बाली लगाए पनि यो धानमा कुनै असर नभइ उत्पादन हुन्छ । यसलाई मैले फिल्ममार्फत् समाजसँग जोड्ने प्रयास गरेको हुँ,’ उनी सुनिए । उपन्यास लेख्नभन्दा फिल्मको कथा लेख्न सजिलो रहेको पनि उनको अनुभव छ । र, उनलाई लेखनमै आनन्द लाग्छ ।
अभिनेता प्रवीन खतिवडाको बुझाईमा ‘मनसरा’ सामाजिक कथा हो । श्रमिक र परिवारबाट विछोड भएका मान्छेको कथालाई फिल्ममा प्रस्तुत गरिएको उनले बताए । आफ्नो भूमिका साधारण कृषकको रहेको जानकारी गराउँदै उनले दर्शकलाई फिल्म मनपर्ने विश्वास व्यक्त गरे ।
त्यस्तै, अभिनेत्री मिरुना मगर ‘मनसरा’लाई समाजको वास्तविक कथा मान्छिन् । आफ्नो भूमिकालाई दर्शकले मन पराउनेमा पनि उनी आशावादी देखिएकी छन् । उनी भन्छिन्, ‘कुनै पनि कलाकारले निर्देशकले दिएको भूमिका अनुसार आफूलाई प्रस्तुत गर्ने हो । यसमा पनि निर्देशकले दिएको भूमिकालाई मैले सक्दो निभाउने प्रयास गरेको छु ।’ अर्की अभिनेत्री मेनुका प्रधान पनि फिल्ममा आफ्नो भूमिका दर्शकलाई मनपर्नेमा विश्वस्त छिन् ।
निर्देशक सुब्बा स्वयंको लेखन रहेको फिल्ममा दयाहाङ राई पनि मुख्य भूमिकामा छन् । फिल्मका निर्माता शैलेन्द्र ध्वज कार्की हुन् भने छायाँकार पनि उनी नै हुन् । सिजन दाहाल कार्यकारी निर्माता रहेको फिल्ममा विष्ण कुमार थेबे, पर्शु अधिकारी र जीवन लिम्बू थाक्लुङ सह-निर्मातामा छन् ।
