भनिन्छ, ‘१२ वर्षपछि बगेको खोला पनि फर्कन्छ ।’ खोला फर्किन्छ या फर्किन्न, त्यो त थाहा छैन तर बलिउड अभिनेत्री तब्बू भने १२ वर्षपछि हलिउड फर्किने भएकी छन् । पछिल्लोपटक सन् २०१२ मा आएको हलिउड फिल्म ‘लाइफ अफ पाई’मा देखिएकी उनले अब ओस्कार अवार्ड विजेता फिल्म ‘ड्यून’को प्रिक्वेलमा काम गर्न लागेकी हुन् । उनी यसमा अनुबन्धित भइसकेको जनाइएको छ ।
चर्चित अंग्रेजी अनलाइन भेराइटीका अनुसार, तब्बूलाई स्ट्रीमिङ प्लेटफर्म (ओभर-द-टप) म्याक्सले ‘ड्यून’को प्रिक्वेल सिरिज ‘ड्युन : प्रोफेसी’मा एक महत्त्वपूर्ण भूमिकामा लिएको हो । यसमा उनले ‘सिस्टर फ्रान्सेस्का’को चरित्र निभाउनेछिन् । उनको चरित्रलाई शक्तिशाली र बुद्धिमानी भनिएको छ । सिरिजमा फ्रान्सेस्काको आगमनले पूँजी शक्तिको सन्तुलन उथलपुथल गर्ने जनाइएको छ ।
‘लाइफ अफ पाई’बाट तब्बूको हलिउडमा डेब्यु भएको थियो । यसमा उनीसहित भारतीय कलाकारहरु स्वं. इरफान खान, आदिल हुसेन र सूरज शर्माको पनि अभिनय थियो । त्यसबेला यो फिल्मले ४ वटा ओस्कर जितेको थियो । यसपछि तब्बूले अर्को हलिउड फिल्म ‘द नेमसेक’मा काम गरिन्, जुन सन् २००६ मा प्रदर्शन भएको थियो । उनी अभिनीत पछिल्लो बलिउड फिल्म भने ‘क्रू’ हो ।
