सुपरस्टार भुवन केसीको करिअरको कोशेढुंगा मानिन्छ, ‘करोडपति’ । यो फिल्म निर्माण गर्ने बेला धेरैलाई उनलाई ‘कि भुवन केसी करोडपति हुन्छ, कि रोडपति हुन्छ’ भनेर टिप्पणी गरेका थिए । भुवनलाई फिल्मले नामजस्तै करोडपति नै बनायो । उनलाई नाफा मात्र डेढ करोड भएको थियो । यो दुई दशकअघिको कुरा हो । अब फेरि भुवनले यही नाममाथि फिल्म बनाउन लागेको चर्चा छ ।

त्यसो त २०७० सालतिरै ‘करोडपति २’ बनाउने जानकारी भुवनले सञ्चारमाध्यमलाई गराएका थिए । तर, त्यसबेला विभिन्न कारणले फिल्म बन्न सकेन । अब भने उनी यसै वर्षभित्र ‘करोडपति २’ बनाउने तयारीमा जुटेको निकट स्रोतले जानकारी गराएको छ । केही हप्ताअघि भुवनले स्क्रिप्ट डाक्टर मनोज पण्डितसँग भेट गरेका थिए । उनीहरुको त्यो भेट ‘करोडपति २’कै लागि भएको बताइन्छ ।

यसमा अभिनेता अनमोल केसीको मुख्य भूमिका रहनेछ भने भुवन स्वयं पनि देखिने स्रोतको दाबी छ । फिल्मले दुई पुस्ताको कथा भन्ने जनाइएको छ । निर्देशन पनि भुवन स्वयंले गर्ने स्रोत बताउँछ । यसअघि उनले ‘ड्रिम्स’ (२०१६) निर्देशन गरेका थिए । काजल फिल्म्सको ब्यानरमा निर्माण हुन लागेको फिल्मको छायांकन दशैं आसपासमा सकाएर नयाँ वर्षमा रिलिज गर्ने तयारी भैरहेको छ ।

२ वर्षदेखि भुवन चलचित्र विकास बोर्डको अध्यक्ष छन् । आगामी साउनमा उनको कार्यकाल सकिँदैछ । त्यसपछि फिल्म निर्माणमा जुट्न लागेका उनीसँग ‘करोडपति २’सहित अरु पनि फिल्म छन् । बोर्डमा नजाँदै उनले ‘माइतीघर २’, ‘पारस’, ‘एन्टी हिरो’ बनाउने घोषणा गरेका थिए । तर, अब यी फिल्म बन्नेमै आशंका छ । छायांकन नहुँदासम्म ‘करोडपति २’ पनि के हुन्छ, यसै भन्न सकिँदैन ।