कमल एक्चै मगरको निर्देशनमा तयार भएको फिल्म ‘शिरफूल’ आगामी असार ७ गतेदेखि प्रदर्शनमा आउने भएको छ । सोमबार एक पोस्टर सार्वजनिक गर्दै प्रदर्शन मिति घोषणा गरिएको हो । यो मितिमा अभिनेत्री पूजा शर्मा अभिनीत ‘दान्भी’ र स्वर्गीय गायक भक्तराज आचार्यको बायोपिक फिल्म ‘आचार्य’ पनि प्रदर्शनमा आउँदैछन् । अर्थात् असार ७ मा त्रिपक्षीय भिडन्त हुने भएको छ ।
‘शिरफूल’मा रुपा राना, राज थापा, देवराज आले, विनिता थापा, सुनिल रोका, नमिता तामाङ, पूजा गदाल, लिला गुरुङ, नीता पुन, किरण मगर लगायतको अभिनय छ भने अभिनेत्री मरिष्का पोखरेल विशेष भूमिकामा छिन् । फिल्ममा राजु थापा, डिपी खनाल र कृष्ण केसीको रचना, हरि लम्साल र देवराज आले मगरको संगीत, निरोज श्रेष्ठको छायांकन र मिलन श्रेष्ठको सम्पादन रहेको छ ।
नेपाली समाजमा छोरी चेलीलाई शिरको फूलको रुपमा लिने चलन भएकोले फिल्ममा छोरीलाई बिम्बको रुपमा बुझाउन खोजिएको निर्देशक मगरले बताए । आशीर्वाद पुन र माया छन्त्याल पुनको निर्माण रहेको फिल्ममा देवराज आले मगरको कथा र राज थापा र राजु युगिनको पटकथा तथा संवाद छ । कमलले यसअघि ‘डेसान’ बनाएका थिए । यसले यतिबेला विभिन्न अवार्ड जितिरहेको छ ।
