आगामी साउन ११ गते अर्थात् जुलाई २६ बाट प्रदर्शनमा आउने तयारीमा रहेको फिल्म ‘ईश्वर’को नयाँ पोस्टर सार्वजनिक गरिएको छ । गणतन्त्र दिवसको अवसर पारेर मंगलबार सार्वजनिक पोस्टरमा फिल्मका मुख्य अभिनेता पृथ्वीराज प्रसाईं र अभिनेत्री अनु शाह प्रस्तुत छन् । दुवै रोमान्टिक भावमा देखिएका छन् । अनु र पृथ्वीले यो फिल्मबाट करिब ५ वर्षपछि कमब्याक गरेका हुन् ।

दिव्या कंगना फिल्मस्को प्रस्तुतिमा हरिबहादुर थापाको निर्माण रहेको फिल्ममा सुनिल थापा, माओत्से गुरुङ, शिशिर बाङ्देल, ध्रुव थापा, रविन्द्र झा, बुद्धि तामाङ, सविन बास्तोला, कृष्टि गुरुङ, गीता अधिकारी लगायतको अभिनय छ । अघिल्लो हप्ता पोखराको ट्रेड मल सिनेप्लेक्समा फिल्मको प्रिमियर गरिएको थियो । फिल्म हेरेका दर्शक कथावस्तुले भावुक बनेको निर्देशक गिरीले बताए ।

लक्ष्मी कुँवर थापाको प्रस्तुति रहेको फिल्ममा अर्जुन पोखरेल, राजेन्द्र बजगाई तथा बीपी वाग्लेको संगीत, कविराज गहतराज, देवेन्द्र पाण्डे र सुरेश पाण्डेको कोरियोग्राफी रहेको छ । फिल्ममा रामेश्वर हुँमागाईको छायांकन तथा देव महर्जनको द्वन्द्व निर्देशन छ भने भोजराज देवकोटाको पटकथा तथा संवाद लेखन छ । यो फिल्मलाई देशभर वितरणको अधिकार आरआर फिल्म्सले लिएको छ ।