निर्देशक सिमोस सुनुवारले एकपटक फेरि अभिनेता सौगात मल्ललाई लिएर फिल्म बनाउने भएका छन् । यसअघि ‘झ्यानाकुटी’ र ‘हात्तीछाप’मा सहकार्य गरेका उनीहरुको नयाँ फिल्म ‘जन्ते बाख्रो’मा टिमअप भएको छ । सोमबार सौगातसँग निर्माताले कागजी सम्झौता गरेका छन् । आगामी भदौबाट छायांकनको तयारी गरिएको फिल्म गाम्रीण परिवेशमा आधारित हुने जानकारी प्राप्त छ ।

प्रदीप भारद्वाजको लेखन रहेको फिल्ममा सौगातको जोडी अभिनेत्री गरिमा शर्मा बाँधिने सम्भावना प्रवल छ । उनीसँग निर्देशक र लेखकले केही चरण छलफल गरिसकेका छन् । गरिमा पनि फिल्ममा काम गर्न सकारात्मक रहेको स्रोतको दाबी छ । उनको डेब्यु फिल्म ‘लण्डन टू पेरिस’ यही जेठ २५ गतेबाट प्रदर्शनमा आउने तयारीमा रहेको छ भने दोस्रो फिल्म ‘ह्रस्व दीर्घ’ दशैंमा आउँदैछ ।

मुईन इन्टरटेनमेन्टको ब्यानरमा बन्न लागेको ‘जन्ते बाख्रो’ कमेडी कथावस्तुमा बन्न लागेको शीर्षकले बुझाउँछ । बेहुली ल्याउने दिन जन्तीलाई खुवाइने मांसाहारी भोजनलाई जन्ते बाख्रो भन्ने प्रचलन छ । फिल्मले यसैलाई कथाको मुख्य विषयवस्तु बनाएको हुनसक्ने देखिन्छ । फिल्ममा सन्तोष गौतम र निर्देशक सुनुवारको निर्माण रहनेछ । यो फिल्ममा काम गर्न सौगात उत्साहित देखिएका छन् ।