गत हप्ताका दुई फिल्म ‘पूजार सार्की’ र ‘फर्की फर्की’को भिडन्तले फिल्म क्षेत्र राम्रै गर्मायो । दुवैमा अहिलेका ‘स्टार’ कलाकारको अभिनय भएकाले यसलाई प्रतिष्ठाको लडाइँको रुपमा हेरिएको थियो । यी दुई फिल्मले शनिबारसहित तीनवटा विदा भेटेका थिए । र, विदामा दुवैले राम्रो कमाए । तर, दोस्रो हप्तामा प्रवेश गर्दा पनि दुवै फिल्मका निर्माताले व्यापार सार्वजनिक गर्न सकेका छैनन् ।
फेसबुकमा हरेकदिन हाउसफुलको तस्वीर राखिरहेका दुईटै फिल्मका निर्माताले व्यापार सार्वजनिक नगरेपछि भने धेरैमा आशंका उब्जिएको छ । कतै अपेक्षाअनुसार ‘पूजार सार्की’ र ‘फर्की फर्की’ले व्यापार नगरेका त होइन भन्ने प्रश्न उठेको छ । बुझिएअनुसार यी दुवै फिल्मका निर्माता एकअर्काको रणनीति हेरेका बसेका छन् । यसैले दुईवटै टिम ‘तैँ चुप मैँ चुप’को अवस्थामा देखिएको छ ।
यद्यपि, फिल्मसम्बन्धी जानकारी गराउने कार्यक्रम ‘रजतपट’ले आफ्नो अनुसन्धानको आधारमा बिहीबार दुवै फिल्मको एक हप्ताको कलेक्सन रिपोर्ट सार्वजनिक गरेको छ । पहिलो हप्ता दुई फिल्मको गरी साढे ५ करोड व्यापार रहेको जनाइएको छ । र, यी दुवै फिल्मले समान २ करोड २५ लाख बाँडेको उल्लेख छ । तर, यो रिपोर्टलाई लिएर दुवै निर्माताबाट आधिकारिक पुष्टि भएको छैन ।
‘रजतपट’को रिपोर्टलाई आधार मान्ने हो भने ‘पूजार सार्की’ र ‘फर्की फर्की’को व्यापार न अपेक्षाकृत न निराशाजनक देखिन्छ । तर, यो हिसाबले दुवै फिल्मलाई घरेलु बजारबाट लगानी उठाउन अझै ठूलो संघर्ष गर्नुपर्नेछ । ‘पूजार सार्की’ले लगानी उठाउन कम्तिमा ६ करोड र ‘फर्की फर्की’ले ८ करोड ग्रस व्यापार गर्नुपर्ने दबाब छ । यो हप्ताको व्यापार यी दुवै फिल्मका लागि निर्णायक रहनेछ ।
