कमल एक्चै मगरको निर्देशनमा बनेको नयाँ फिल्म ‘शिरफूल’को ट्रेलर सार्वजनिक गरिएको छ । सोमबार सार्वजनिक १ मिनेट ४४ सेकेण्ड लम्बाईको ट्रेलरमा बढ्दो आधुनिकताको प्रभाव, लाहुरे संस्कृति, आदिवासी जनजातिको परम्परा, रीतिरिवाज र साँस्कृतिक पहिचानलाई देखाउन खोजिएको छ । फिल्मले छोरी-चेलीलाई शिरको फूलको रुपमा ब्याख्या गर्दै शीर्षकलाई सम्बोधन गरेको छ ।
आगामी असार ७ गतेदेखि सार्वजनिक प्रदर्शनमा आउन लागेको फिल्ममा रुपा राना, राज थापा, देवराज आले, विनिता थापा मगर, सुनिल रोका, कमल एक्चै मगर, पुजा गदाल, लिला गुरुङ, किरण मगर, नीता पुन लगायतको अभिनय छ । आशिर्वाद पुन मगर र माया छन्त्याल पुनको लगानी रहेको फिल्ममा देवराज आले मगरको कथा तथा राज थापा र राजु युगिनको पटकथा तथा संवाद छ ।
‘शिरफूल’मा राजु थापा, डिपी खनाल र कृष्ण केसीको शब्द, हरि लम्साल र देवराज आले मगरको संगीत, निरोज श्रेष्ठको छायांकन तथा मिलन श्रेष्ठको सम्पादन छ । फिल्ममा अभिनेत्री मरिश्का पोखरेल विशेष भूमिकामा प्रस्तुत छिन् । निर्देशक मगरले यसअघि फिल्म ‘डेसान’ बनाएका थिए । जसले यतिबेला विभिन्न अवार्ड जितिरहेको छ । ‘शिरफूल’ भने कमल निर्देशित पहिलो फिल्म हो ।
