आगामी साउन १८ गतेबाट प्रदर्शनको तयारीमा रहेको फिल्म ‘मोदीबेनी’को ‘क्यारेक्टर’ पोस्टर सार्वजनिक गरिएको छ । फिल्मकी अभिनेत्री वर्षा सिवाकोटी र अभिनेता अमर प्रताप श्रेष्ठलाई समेट्दै सार्वजनिक दुईवटा छुट्टाछुटै पोस्टरले उनीहरुको चरित्रचित्रण गर्छ । र, मनोदशा दर्शाउँछ । वर्षा रिसाहा भावमा प्रस्तुत छिन् भने अमर बाँसको मोटो भाटा लिएर एक्सन मुडमा देखिएका छन् ।
फिल्मलाई शङ्कर कोइरालाले निर्देशन गरेका हुन् । निर्देशनको हिसाबले यो उनको डेब्यु फिल्म हो । तर, सम्पादनमा उनी अनुभवी मानिन्छन् । रेजिना उप्रेती, प्रवीण खतिवडा, सरोज खनाल, कमलमणि नेपाल, जीवन भट्टराई, स्नेहा भट्टराई, सरोज अर्याल, दीलिप केसी, लाबिस, अनामिका लामिछाने लगायतको फिल्ममा अभिनय छ । यही फिल्मबाट रेजिनाले ९ वर्षपछि कमब्याक गरेकी हुन् ।
पर्वत जिल्लाको धार्मिक क्षेत्र मानिने मोदीबेनीमा घटेको एउटा अविश्वसनीय घटनामा आधारित भएर बनेको फिल्मको कथा त्यहाँको मात्र नभई नेपालको जुनसुकै स्थानमा पनि त्यस्ता घटनाहरु भैरहेको पाइने निर्देशक कोइरालाले बताए । उनले फिल्ममा बदलाको कथा रहेको पनि प्रष्ट पारेका छन् । फिल्ममा आनन्द बिक्रम क्षेत्रीको कथा, पटकथा र संवाद छ भने उत्सव दाहालको डिओपी छ ।
डिनेस्ट इन्टरटेनमेन्टको प्रस्तुतिमा बनेको यस फिल्मको निर्माता दीलिप केसी हुन् भने सह-निर्मातामा हरि श्रेष्ठ छन् । भरत रेग्मीको सम्पादन, दीपेन्द्र गौतम (माइकल)को प्रोडक्शन डिजाइन, श्याम बरालको मेकअप, भीम श्रेष्ठको ड्रेस डिजाइन र सगुन तामाङको मुख्य सहायक निर्देशन रहेको फिल्मलाई रिच इन्टरटेन्मेन्टले काठमाडौं उपत्यका तथा एफडीले उपत्यकाबाहिर वितरण गर्दैछन् ।
