अक्सर फिल्मको सम्पूर्ण गीत प्रदर्शनभन्दा अगाडि नै सार्वजनिक गरिन्छ । त्यसले फिल्मको हाइप निर्माणमा भूमिका खेल्ने विश्वास मेकरमा हुन्छ । तर, कथा खुल्ने गीत छ भने फिल्म प्रदर्शन भएपछि मात्र सार्वजनिक गर्ने परिपाटी छ । फिल्म ‘लण्डन टू पेरिस’को ‘हतारले’ गीत पनि प्रदर्शनको चार दिनपछि सार्वजनिक गरिएको छ । किनकि, यो गीतले फिल्मको महत्त्वपूर्ण ‘सस्पेन्स’ खुलाउँछ ।
गीतमा नव-अभिनेता निश्चल खड्का र अभिनेत्री रुष्मा थापाबीच प्रेम अंकुराएको देखिन्छ । जबकि, ट्रेलरमा निश्चलको प्रेम अभिनेत्री साम्राज्ञी आरएल शाहसँग देखाइएको थियो । यसले गर्दा नै फिल्मको ‘सस्पेन्स’ खुल्ने डरले निर्माण टिमले यो गीत लुकाएको थियो । सलिन मगरको शब्द, संगीत र स्वर रहेको गीतमा अभिनेता कबीर खड्का र अभिनेत्री गरिमा शर्माबीचको प्रेम पनि देख्न सकिन्छ ।
घनश्याम लामिछानेको निर्देशन तथा प्रदीप भारद्वाजको लेखन रहेको फिल्मले बक्स अफिसमा भने कमजोर प्रदर्शन गरिरहेको छ । यद्यपि, यो फिल्मबाट डेब्यु गरेका निश्चलले वाहवाही बटुलेका छन् । उनले अभिनयमा राम्रो सम्भावना देखाएका छन् । विशेषगरी उनको ‘डाइलग डेलिभरी’ र ‘भ्वाइस’ प्रशंसनीय छ । यसको निर्माता अमित बस्नेत, आरोन बस्नेत, एरियाना बस्नेत र परी राना हुन् ।
