अभिनेत्री पूजा शर्माको छवि ‘लभर गर्ल’को रुपमा बनेको छ । ‘प्रेमगीत’ होस् वा ‘म यस्तो गीत गाउँछु’ श्रृंखला, यी फिल्मले उनलाई रोमान्टिक भूमिकामा स्थापित गराए । तर, उनी ‘स्टेरियोटाइप’ भएको आरोप भने अक्सर लाग्ने गरेको थियो । यसैले पनि हुनसक्छ, पूजाले आफ्नो ‘कम्फर्ट जोन’बाट बाहिर निस्किएर पहिलोपटक एक्सन प्रधान फिल्ममा काम गरेकी छन् । त्यो फिल्म हो, ‘दान्भी’ ।

ट्रेलर सार्वजनिक भएपछि धेरैले उनको एक्सनको तारिफ गरेका छन् । उनी पनि फिल्मलाई लिएर उत्साहित र गम्भीर देखिन्छिन् । अहिलेसम्म सबैभन्दा बढी मिहिनेत यही फिल्ममा गरेको उनको अनुभव छ । बुधबार पत्रकारसँगको भेटमा उनले भनिन्, ‘मलाई यो फिल्ममा काम गर्न एकदमै गाह्रो भयो । मैले अहिलेसम्म गरेका फिल्ममध्ये सबैभन्दा गाह्रो र मेहनत गरेको फिल्म यही नै हो ।’

उनी ‘दान्भी’लाई आफूले ‘रिक्स’ लिएर काम गरेको फिल्म मान्छिन् । ‘यसमा मैले ‘रिक्स’ नै लिएको हुँ । मैले कहिल्यै एक्सन गरेको थिइनँ । यो जनरामा काम पनि गरेको थिइनँ,’ उनी भन्छिन्, ‘लभस्टोरी मात्र गरिरहेकाले नयाँ अनुभव हुन्छ भनेर ‘दान्भी’ गरेको हुँ । यसपछि चाहिँ एक्सनको बारेमा धेरै ज्ञान भयो ।’ ‘दान्भी’मा आफूले गरेको एक्सन दर्शकलाई वास्तविक लाग्नेमा पूजा विश्वस्त छिन् ।

नेपालमा महिला केन्द्रित एक्सन फिल्म विरलै बन्ने गरेकाले दर्शकलाई ‘दान्भी’ नयाँ लाग्ने पूजाको विश्वास छ । भन्छिन्, ‘पहिला रेखा थापाको एक्सनको चर्चा हुन्थ्यो । अचेल महिला पात्रले एक्सन गरेको फिल्म कमै आइरहेको छ । यसैले दर्शकहरुलाई फिल्म नयाँ लाग्छ भन्नेमा विश्वस्त छु । र, दर्शकहरु पनि उत्साहित हुनुहुन्छ । एउटा केटीले एक्सन गरेकाले फिल्मलाई ‘नोटिस’ गर्नुभएको छ ।’

पूजालाई ‘दान्भी’मा काम गर्न एक्सनले नै आकर्षित गरेको रहेछ । र, यसका लागि आफूले धेरै अभ्यास गरेको उनी स्मरण गर्छिन् । ‘मलाई फिल्मको एक्सन पार्टले नै तानेको हो । मैले यसका लागि धेरै अभ्यास गरेँ । एक महिना जति एक्सन सिकेँ । त्यो सिकाईले सुरुमा हात-खुट्टा नै चल्दैन थियो । सुटिङमा एकैदिन ६/७ घण्टा एक्सन गरेँ । अहिले पनि त्यो सम्झिँदा गाह्रो हुन्छ,’ उनले भनिन् ।

बदलाको कथामा आधारित रहेको ‘दान्भी’ आगामी असार ७ गतेबाट सार्वजनिक प्रदर्शनमा आउँदैछ । रुपेश तामाङको निर्देशनमा बनेको फिल्ममा पूजाको जोडी नव-अभिनेत्री कुन्साङ बम्जनसँग बाँधिएको छ । करिब दुई साताअघि सार्वजनिक ट्रेलरमा एक्सन पक्ष सशक्त देखिएको छ । विशेषगरी पूजाको एक्सनले ध्यान खिच्छ । ट्रेलरमा उनलाई ‘लेडी टाइगर’को उपाधि पनि दिइएको छ ।