राजु गिरीको निर्देशनमा बनेको फिल्म ‘ईश्वर’को ट्रेलर सार्वजनिक गरिएको छ । २ मिनेट लामो ट्रेलरमा अन्तरजातीय प्रेममा आउने अवरोधलाई देखाइएको छ । ध्रुव थापा र कृष्टि गुरुङ मायामा छन् । तर, उनीहरुको जात मिल्दैन । जात मिल्ने बुद्धि तामाङलाई कृष्टिले मन पराउँदिनन् । ट्रेलरले यी तीन पात्रलाई नै पछ्याएको छ । अनु शाह र पृथ्वीराज प्रसाइँबीचको प्रेम पनि देख्न सकिन्छ ।
आगामी साउन ११ गतेदेखि प्रदर्शनमा आउन लागेको यो फिल्ममा सुनिल थापा, शिशिर वाङ्गदेल, माओत्से गुरुङ, सबिन बास्तोला, रविन्द्र झा लगायतको पनि अभिनय छ । दिव्या कंगना फिल्म्सको ब्यानरमा निर्माण भएको फिल्मका निर्माता हरिबहादुर थापा हुन् । लक्ष्मी कुँवर थापाको प्रस्तुति रहेको फिल्ममा निर्देशक गिरीकै कथा छ भने भोजराज देवकोटाको पटकथा तथा संवाद लेखन छ ।
फिल्ममा अर्जुन पोखरेल, राजेन्द्र बजगाई र बीपी वाग्लेको संगीत, कविराज गहतराज, देवेन्द्र पाण्डे र सुरेश पाण्डेको कोरियोग्राफी, रामेश्वर हुँमागाईको छायांकन तथा देव महर्जनको द्वन्द्व निर्देशन रहेको छ । फिल्मको देशभर वितरणको जिम्मा आरआर फिल्म्सले लिएको छ । यही फिल्मबाट अनुले पाँच वर्षपछि अभिनयमा कमब्याक गरेकी हुन् । उनको पछिल्लो प्रदर्शित फिल्म ‘पसिना’ हो ।
