१९ वर्षको एउटा युवक, जो अंकलसँग चुनाव प्रचार गरिरहेको थियो । त्यो प्रचारलाई चुस्त बनाउन उसले कुनै कसर बाँकी छाडेन । अंकलले लोकसभा चुनाव पनि जिते । तर, यो प्रचारको दौरानमा ती युवकले एउटा प्रण गरे, ‘जेसुकै भए पनि राजनीतिमा चाहिँ आउँदिनँ ।’ न उनलाई राजनीति मनपर्यो न त्यसको तौरतरिका । ऊ अल्छी स्वभावको थियो । उसको प्रेम सिर्फ खानाप्रति थियो ।
खानाप्रतिको प्रेमकै कारण उसले भविष्यमा एउटा ठूलो होटल खोल्ने लक्ष्य लियो । तर भनिन्छ नि, ‘कोपिलाले कस्तो आकार लिन्छ भन्ने कुरा नफुल्दै अनुमान गर्न सकिँदैन ।’ प्रत्येक कोपिलाको आफ्नै निश्चित आकार हुन्छ । ती युवकको जीवनमा पनि यस्तै भयो । एउटा ठूलो होटल खोल्ने सोच बनाएको ऊ अहिले साउथ फिल्मको सुपरस्टार बनेको छ । उनी हुन्, प्रभास । अर्थात् ‘रेबेल स्टार’ ।
पिता उप्पलपति सूर्य निर्माता र चुनाव समेत जितेका अंकल कृष्णम राजू साउथ फिल्मका ठूला स्टार थिए । पिताले बनाएको फिल्म ‘भक्त कन्नप्पा’ हेरेपछि प्रभासले होटलको सपना त्यागेर हिरो बन्ने लक्ष्य लिए । सन् २००२ मा आएको ‘ईश्वर’बाट उनको त्यो सपना पूरा भयो । त्यसपछि ‘वर्षम’ले उनलाई तेलुगू इन्डस्ट्रीमा पहिचान दिलायो । ‘बाहुबली’ले भने प्रभासलाई ‘पेन इन्डिया स्टार’ बनायो ।
उनलाई ‘स्टारडम’को घुड्की निर्देशक एसएस राजामौलीले पिलाएका हुन् । सन् २००५ मा आएको राजामौलीको फिल्म ‘छत्रपति’ले उनलाई करिअरको उत्कर्षमा पुर्याएको थियो । यसपछि ‘डार्लिङ’, ‘रेबेल’, ‘मिर्ची’ जस्ता फिल्मबाट उनले गजब ‘स्टारडम’ बनाए । ‘बाहुबली’ सिरिजले त उनलाई विश्वव्यापी चर्चा दिलायो । अहिले उनी तेलुगू इन्ड्रस्टीका सफल र महंगा अभिनेता कहलिएका छन् ।
प्रभासको करिअरकै उत्कृष्ट फिल्मको रुपमा ‘बाहुबली’लाई लिइन्छ । तर, यसका लागि उनी पहिलो रोजाई भने थिएनन् । निर्देशक राजामौली बलिउड सुपरस्टार ऋतिक रोशनलाई फिल्म बनाउन चाहन्थे । तर, उनले अस्वीकार गरेपछि प्रभासको पोल्टामा फिल्म परेको थियो । यही फिल्मका लागि उनले करिब चार वर्ष समय दिएका थिए । अन्ततः यसले उनलाई नसोचेको सफलता दिलायो ।
